Վարչապետ Սալմոնդը լավատես է
Շոտլանդիայում այս տարվա գարնանը սկսված անկախության հանրաքվեի նախապատրաստական աշխատանքները մոտենում են ավարտին. սեպտեմբերի 18-ին կայանալիք հանրաքվեին հաշված օրեր են մնացել: Վարչապետ Ալեքս Սալմոնդը օրերս Աբերդինում շոտլանդացի ձախամետ ընտրազանգվածին եւ մասնավորապես անկախացման հարցում հոռետեսորեն տրամադրված կանանց կոչ արեց միավորվել «Շոտլանդիանՙ շոտլանդացիներին» կարգախոսի շուրջը:
Ֆրանսիական «Մոնդ» օրաթերթը գրում է, որ Եվրոպայի նավթային մայրաքաղաք Աբերդինում Շոտլանդիայի ազգային կուսակցության համագումարի առիթով հավաքված հազարավոր մարդկանց առջեւ ելույթ ունենալովՙ կուսակցապետ Սալմոնդը հորդորել է քվեարկել անկախության օգտին:
«Այս հանրաքվեն չի վերաբերում որեւէ կուսակցության կամ վարչապետի… Խոսքը Շոտլանդիայի ապագան շոտլանդացիներին հանձնելու մասին է», ընդգծել է Ալեքս Սալմոնդը:
Վերջին ամիսների ընթացքում առաջին անգամ ի հայտ են եկել անկախության կողմնակիցների հնարավոր հաղթանակի նախանշաններ, արձանագրում է «Մոնդը»: Այսպես, հանրային հարցումների վերջին տվյալների համաձայն, անկախության կողմնակիցները կազմում են 40 տոկոս, հակառակորդներըՙ 45 տոկոս, մինչ ընտրազանգվածի 15 տոկոսը դեռ չի կողմնորոշվել: Հենց այդ 15 տոկոսի քվեների համար է պայքարում վարչապետ Սալմոնդը:
Անկախական Սալմոնդը խոստանում է ձեւավորել «Շոտլանդական թիմ», որը վեր կլինի քաղաքական նեղ շահերից եւ հանրաքվեի դրական արդյունքի դեպքում մինչեւ 2016 թ. մարտի 24-ը կբանակցի անկախության պայմանների շուրջը, մասնավորապեսՙ նավթային եկամուտների, ազգային արժույթի, ատոմային զենքի դուրսբերման եւ ԵՄ անդամության առնչությամբ:
59-ամյա Սալմոնդը եւ իր հետեւորդները ձգտում են իրենց կողմը գրավել Շոտլանդիայի աշխատավորական կուսակցության կողմնակից ընտրողներին: Իր ելույթում Սալմոնդը խոստացել է, որ «անկախ Շոտլանդիայում վերջ կգտնի շոտլանդացիների չընտրած պահպանական կառավարությունների ժամանակաշրջանը»:
2011 թ. ընտրություններից ի վեր Շոտլանդիայի ինքնավար խորհրդարանում Ազգային կուսակցությունը 65 տեղ ունի Աշխատավորական կուսակցության 38 եւ պահպանողական 15 պատգամավորների դիմաց: Մնացյալ տեղերը զբաղեցնում են լիբերալ-դեմոկրատները, «կանաչները» եւ անկախ թեկնածուները:
Իր ելույթում Սալմոնդը նաեւ խոստացել է, որ անկախ եւ հարուստ Շոտլանդիան կազատվի լոնդոնցի պահպանողականների սահմանած հարկերից, կունենա լավ վարձատրվող բուժքույրեր եւ հանրային առողջապահության կայուն համակարգ: Վարչապետը կին ընտրողների կասկածները փարատելու համար նրանց խոստացել է երկու սեռերի աշխատավարձերի հավասարություն եւ ձեռնարկությունների վարչական խորհուրդներում կանանց առնվազն 40 տոկոսանոց ներկայացուցչություն:
Օգոստոսի 25-ին Ալեք Սալմոնդը հեռուստատեսային բանավեճ անցկացրեց անկախության հակառակորդների առաջնորդիՙ Աշխատավորական կուսակցության նախկին նախարար Ալիստեր Դառլինգի հետ: «Գարդիան» թերթի տվյալներով, հեռուստադիտողների 71 տոկոսը դրական է գնահատել Սալմոնդի դիրքորոշումն ու պատասխանները: Սալմոնդը մասնավորապես վստահ է, որ ԵՄ անդամակցության հարցում Շոտլանդիային չեն մերժի, քանի որ երկիրը վաղուց կատարում է գործող կանոնները: Ինչ վերաբերում է արժույթին, եթե Լոնդոնը հրաժարվի կիսել ֆունտստեռլինգը Շոտլանդիայի հետ, ապա վերջինս չի ստանձնի Միացյալ Թագավորության պետական պարտքի իր բաժինը:
