2014թ. հուլիսի 1-ի դրությամբ լուծարվել է 19 եւ կոնսերվացվել 26 հորատանցք: Այս մասին երեկ կառավարության նիստում հայտնեց բնապահպանության նախարար Արամայիս Գրիգորյանը : Նշելով, որ Հայաստանի ստորերկրյա ջրային պաշարի ավելի քան 50 տոկոսը կենտրոնացած է Արարատյան արտեզյան ավազանում, նախարարը հայտնեց, որ ստորերկրյա ջրերն օգտագործելու նպատակով տասնյակ տարիների ընթացքում փորվել են բազմաթիվ հորատանցքեր, որոնց զգալի մասն ապօրինի է եւ օգտագործվում է պոմպերի օգնությամբ: Չօգտագործվող ջրի բացասական մակարդակով հորատանցքերը լցվում են տարատեսակ պինդ եւ հեղուկ թափոններով եւ աղտոտում ջրատար ապարները եւ ջրերը: Նկատի ունենալով այս հանգամանքը, կառավարության երեկվա որոշմամբ, 2014-ի երրորդ եռամսյակում նախատեսվում է լուծարել կամ կոնսերվացնել շուրջ 40 ինքնաշատրվանող կամ բացասական մակարդակով հորատանցք, իսկ չորրորդ եռամսյակի գործողությունները կհաստատվեն հետագայում:
Խնդրին անդրադարձավ նաեւ վարչապետ Հովիկ Աբրահամյանը , ասելով, որ ինքը հետամուտ է լինելու, որպեսզի բոլոր ապօրինի հորերը փակվեն, ինչի վերաբերյալ բնապահպանության նախարարը տարեվերջին հաշվետվություն պետք է ներկայացնի:
