Եվրոխորհրդարանի մայիսի 25-ի ընտրությունների արդյունքները վկայում են, որ այնտեղ մեծամասնություն կազմող Եվրոպական ժողովրդական կուսակցությունը զգալի կորուստ է ունեցել: Կուսակցությունը խորհրդարանի նոր կազմում (751 տեղ) կունենա 212 տեղՙ 2009 թ. իր ունեցած 274-ի դիմաց:
Երկրորդ տեղում է Սոցիալիստների եւ ժողովրդավարների առաջադիմական դաշինքը (187 տեղ կամ քվեների 24,9 տոկոսը): Երրորդ տեղը կզբաղեցնի Ազատականների եւ ժողովրդավարների եվրոպական դաշինքը (72 տեղ, 9,59 տոկոս): «Կանաչները» ստացել են 55 տեղ (7,32 տոկոս): Նրանց հաջորդում են «Եվրոպացի պահպանողականներ եւ բարեփոխականներ» դաշինքը (45 տեղ, 9,59 տոկոս), «Եվրոպացի միացյալ ձախեր- հյուսիսի ձախ կանաչներ» խմբակցությունը (43 տեղ, 5,73 տոկոս) եւ «Ազատության եւ ժողովրդավարության Եվրոպա» խմբակցությունը (35 տեղ, 4,66 տոկոս): Անկախ պատգամավորները խորհրդարանում կունենան 39 տեղ (5,19 տոկոս):
Մնցայալ 63 տեղերը կզբաղեցնեն խորհրդարանում առայժմ խմբակցություններ չունեցող քաղաքական ուժերի ներկայացուցիչները, նշում է Եվրոխորհրդարանի կայքէջը: Նման ուժերից են ծայրահեղ աջերը եւ եվրոհոռետեսները, որոնք նախորդ ընտրությունների (2009 թ.) համեմատությամբ զգալիորեն բարելավել են իրենց ցուցանիշները: Օրինակ, Ֆրանսիայում Մարին Լը Պենի ծայրահեղ աջ Ազգային ճակատը ստացել է բոլոր քվեների 25 տոկոսը (կառավարող սոցիալիստներըՙ 14 տոկոս), իսկ ԵՄ-ից Մեծ Բրիտանիայի դուրս գալու կողմնակից Միացյալ թագավորության անկախության կուսակցությունը իր երկրում ստացել է քվեների ավելի քան 30 տոկոսը:
