Ռուսաստանը չի կարող եւ չի պատրաստվում երաշխավորել Ուկրաինայի տարածքային ամբողջականությունը, հայտարարել է ՌԴ վարչապետ Դմիտրի Մեդվեդեւը Bloomberg TV հեռուստաալիքին տված հարցազրույցում: «Մենք պարտավոր չենք որեւէ մեկին ինչ-որ բան երաշխավորել, քանի որ այդ թեմայով երբեւէ պարտավորություններ չենք ստանձնել», ընդգծել է նա:
«Այդուհանդերձ մեր ելակետն այն է, որ գլխավոր խնդիրը Ուկրաինայի տարածքում իրադրության հանդարտեցումն է: Ոչ թե ինչ-որ մեկին ինչ-որ բան երաշխավորել, այլ հանդարտեցնել այդ իրադրությունը», ասել է ՌԴ վարչապետը ի պատասխան այն հարցին, թե Մոսկվան կարո՞ղ է արդյոք երաշխավորել, որ Լուգանսկի եւ Դոնեցկի մարզերը ոչ թե կմիանան Ռուսաստանին, այլ կմնան Ուկրաինայի կազմում: Վարչապետը իր հերթին «երկխոսության գծով գործընկերներին» կոչ է արել տալ այլ կարգի երաշխիքներ, նշում է ՌԻԱ գործակալությունը:
«Թող երկխոսության գծով մեր գործընկերները, այդ թվում Եվրոմիությունը եւ ԱՄՆ-ը, մեզ ինչ-որ բան երաշխավորեն», առաջարկել է Դմիտրի Մեդվեդեւը:
Վարչապետը այդ գործընկերներից մասնավորապես ակնկալում է երաշխիքներ, որ Արեւմուտքը չի միջամտի Ուկրաինայի ներքին գործերին, որ այդ երկրին չի ներքաշի Հյուսիսատլանտյան դաշինքի մեջ, որ Ուկրաինայի արեւելքի բնակիչները չեն զրկվի ռուսերեն խոսելու հնարավորությունից եւ որ «ինչ-որ խելագար «Աջ հատված» չի գա նրանց մորթելու»:
Սակայն ընդհանուր առմամբ, Մեդվեդեւի կարծիքով, սեփական ժողովրդին երաշխիքներ պետք է տան Ուկրաինայի իշխանությունները, եւ դրա համար անհրաժեշտ է երկխոսություն:
«Ուկրաինայի իշխանությունները պարտավոր են իրենց ժողովրդին երաշխիքներ տալ, որ արեւելքում անդորրություն կլինի, որ իրենք ծանր տեխնիկա, ներառյալ տանկեր, օդանավեր, ուղղաթիռներ չեն կիրառի իրենց մարդկանց դեմ: Ահա թե ինչ է անհրաժեշտ երաշխավորել եւ նստել բանակցության սեղանի շուրջը, խոսել Կիեւի իշխանությունների եւ արեւելքի մարդկանց ապագայի պատկերացումների մասին», պարզաբանել է ՌԴ կառավարության ղեկավարը:
