Ղարաբաղյան հակամարտության նկատմամբ ամերիկյան կողմի վերջին աշխուժության ֆոնին խիստ շահեկան է իմանալ, թե ի՞նչ են առաջարկում ամերիկացի վերլուծաբանները նախագահ Օբամայի վարչությանը: Սառը պատերազմի վերսկսման դեպքում, եւ մինչեւ այդ, ռազմաստրատեգիական ի՞նչ նոր դիրքորոշում պետք է որդեգրի Վաշինգտոնը մեր տարածաշրջանում, արդյո՞ք առաջնային պիտի լինի, դաշնակիցների «նշանակման» գործում, մարդու իրավունքների պահանջները, թե՞ՙ ռազմաքաղաքական եւ տնտեսական շահերը, որոնց սահմանագիծն այս անգամ անցնելու է Ադրբեջանով, որը Թուրքիայի հետ միասին մեկ կողմից կպարփակի Իրանին, իսկ մյուս կողմից պատվար կդառնա ընդդեմ Ռուսաստանի…
Այս եւ նման հարցերն է այս անգամ քննարկում նշանավոր վերլուծաբան, «Ազգ»ի ընթերցողներին արդեն հայտնի ստրատեգ, Stratfor գլոբալ հետախուզության կենտրոնի հիմնադիր-նախագահ Ջորջ Ֆրիդմանն իր վերջինՙ «Սահմանատարածքներ. հայացք Ադրբեջանից» վերլուծական հոդվածում, որը գրել է օրերս Բաքու կատարած այցից հետո եւ որի թարգմանությունը ընթերցողին կմատուցենք մեր հաջորդ համարում:
