Թուրքիայում անցկացվող լեռնադահուկային սպորտի միջազգային վարկանիշային մրցաշարում հաջող հանդես եկավ ծաղկաձորցի Արսեն Ներսիսյանըՙ արժանանալով բրոնզե մեդալի: Էրզրումում անցկացված մրցումներում Արսենը ոլորավայրէջքում ցույց տվեց 1.47,41 րոպե արդյունքՙ զիջելով միայն իրանցիներ Մահդի Սոլողանին եւ Մոհամադ Դարբանդսարին:
Հայաստանը ներկայացրած մեր մյուս լեռնադահուկորդներըՙ Յուրա Մանուկյանն ու Քաջիկ Վարդանյանը գրավեցին համապատասխանաբար 37-րդ եւ 38-րդ տեղերը: Կանանց մրցումներում ծաղկաձորցի Եվա Պապոյանը 20 մասնակիցների մեջ 14-րդն էր:
Սոչիի ձմեռային օլիմպիադայի ուղեգիր նվաճելու համար հարկավոր է տեղ զբաղեցնել 500 ուժեղագույն լեռնադահուկորդների ցանկում: Արսեն Ներսիսյանն այդ ցանկում առայժմ 1268-րդն է: Հայաստանի դրոշի ներքո հանդես եկող ամերիկահայ Արման Սերեբրակյանը ցանկում 931-րդն է: Եթե նրանց չհաջողվի ուղեգիր նվաճել, ապա Հայաստանին կտրվի մեկ սպիտակ քարտ, որով նշված լեռնադահուկորդներից մեկը հանդես կգա Սոչիում:
