Վարշավայում երեկ մեկնարկեց կայծակնային շախմատի Եվրոպայի առաջնությունը: Շախմատիստները մրցանակակիրներին կորոշեն 11 տուրերի արդյունքներով: Ընդ որում յուրաքանչյուր տուրում մրցակիցները միմյանց հետ 2 պարտիա են անցկացնումՙ խաղալով սեւ եւ սպիտակ խաղաքարերով:
4 տուրից հետո Հայաստանը ներկայացնող շախմատիստներից առավել հաջողը Գաբրիել Սարգսյանի եւ Տիգրան Պետրոսյանի ելույթն է, որոնք վաստակել են 7-ական միավոր:
Գաբրիելը առաջին 3 տուրերում միեւնույն 2-0 հաշվով պարտության մատնեց Վոյցեխ Սմիցեկին, Յայմե Ֆեռնանդես դե Բոբադիլային ու Վասիլի Նեդիլկոյին: 4-րդ տուրում Սարգսյանը 1-1 հաշվով ավարտեց Իվան Սալգադոյի հետ մրցախաղը:
Տիգրան Պետրոսյանն էլ մրցաշարը սկսեց 3 անընդմեջ հաղթանակներովՙ միեւնույն 2-0 հաշվով առավելության հասնելով Թոմս Կալնինսի, Դանիել Կոպժիկի եւ Ադամ Դեժժինսկու նկատմամբ: 4-րդ տուրում Տիգրանը մեկ միավոր վաստակեց Կասպեր Դրոզդովսկու հետ մրցախաղում:
Զավեն Անդրեասյանն ու Կարեն Գրիգորյանը վաստակել են 6-ական միավոր: Առաջին տուրում Զավենը 1,5-0,5 հաշվով հաղթել է Յակուբ Ժոստկոյին, ապա 2 պարտիաներն էլ շահել է Ցաբա Բոգնարից եւ Հաննա Էրենսկա-Բարլոյից: Իսկ ահա Արթուր Յուսուպովի հետ մրցախաղում հայ շախմատիստն ընդամենը կես միավոր վաստակեց:
Կարեն Գրիգորյանը միեւնույն 2-0 հաշվով հաղթեց Աննա Մարժուկին եւ Լուկաշ Վինսկուն, մեկական միավոր գրանցեց իր օգտին Ալեքսանդրա Լաչի եւ Արթուրս Բեռնոտասի հետ պարտիաներում:
8-ական միավորով առաջատարներն են Ալեքսեյ Դրեեւը, Ռիչարդ Ռապորտը եւ Քամիլ Միտոնը:
