Դժբախտաբար վերնագիրս չի վերաբերում մեր երկրին, այլ՝ Մ. Նահանգներին, նրա դատավորներին, դատական համակարգին, նախագահ Թրամփին, որ վերջին շրջանում շեղվածության նշաններ է ցույց տալիս, մի քիչ էլ՝ նիկոլականությանը:
Նկատե՞լ եք,- հարց են տալիս բախտագուշակները մեզ,- որ Նիկոլ Փաշինյանը ո՛ր երկրի կամ պետության ղեկավարի հետ հանդիպի, դժբախտ բան է պատահում տվյալ անձին, տվյալ պետությանը: Նա եղավ Վատիկանում, հանդիպեց Ֆրանցիսկոս Պապին, ու մեկ ամիս չանցած վախճանվեց վերջինս: Նիկոլը սերտացրեց հարաբերությունները Ֆրանսիայի նախագահ Էմանուիլ Մաքրոնի հետ, եւ քիչ անց, հերիք չէ, որ կառավարական տագնապների մեջ հայտնվեց այդ երկիրը, Մաքրոնը հրապարակավ ծեծ կերավ Առաջին տիկին Բրիժիտից, ինչը առիթ տվեց ֆրանսիական մամուլին եւ օտարազգի լրատվամիջոցներին՝ քահ-քահ ծիծաղելու Նիկոլի ընկերոջ վրա:
Իսկ ինչ վերաբերում է նախագահ Թրամփին,- շարունակում են նույն բախտագուշակները,- վերջինս իր գրասենյակում Նիկոլին ու Ալիեւին ընդունելուց անմիջապես հետո, ինչպես պնդում են չար լեզու վարակաբանները, մեր վարչապետը վարակել է նախագահ Թրամփին սահմանադրություն եւ օրենք չհարգելու վարակով:
Նման մարդկանց համար թուրքերն օգտագործում են «ուղուրսուզ» արտահայտությունը, այսինքն մարդ՝ որը «ուղուր» (բախտ, հաջողություն) չի բերում:
Դա մենք գիտենք: 2018-ից ի վեր այդ մարդը Հայաստանին ու հայությանը «ուղուր» չի բերում: Ընդհակառակն՝ միայն պարտություն, զոհեր, կորուստներ, անհաջողություն, նսեմություն:
Իսկ բախտագուշակներին ուղղված իմ հարցին, թե տարօրինակ է, որ Նիկոլի հանդիպած ու շփված անձանցից՝ Իլհամ Ալիեւ, Ռեջեփ Թայիբ Էրդողան եւ ուրիշներ, ոչ մի թուրքի կամ թյուրքի հետ ինչո՞ւ «ուղուրսուզ»ության ոչ մի դեպք չի գրանցվում, «Երեւի, Կովկասի գլխավոր մոլլա Ալահշյուքյուր Փաշազադեն այնպիսի մի չարխափան թալիսման է զետեղել Իլհամի ծոցագրպանում, որ ոչինչ չի պատահում նրան, առայժմ», եղավ նրանց պատասխանը:
«Համենայնդեպս, ասացին նրանք, մի օր այդ թալիսմանը անզոր կդառնա, եւ ազերիները, Չարենցի խոսքը կրկնելով՝ նրան կասեն՝ «Մոլլա, ուզո՞ւմ ես սիլլա»…
Իսկ ինչ վերաբերում է Դոնալդ Թրամփին, որը մեկ ամիս առաջ Վաշինգտոնի իր գրասենյակում ընդունել էր Նիկոլին՝ Իլհամի հետ, ձեռքը սեղմել նրա, ըստ երեւույթին, ինչպես ասվեց, վարակել է նախագահ Թրամփին:
Ահա թե ինչու Թրամփը վերջին շրջանում նիկոլական մեթոդներ է կիրառում իր երկրում, մեթոդներ՝ որոնք բնավ չեն կիրառվել նախկին նախագահներից ոչ մեկի կողմից: Արդեն 3-րդ ամիսն է, որ նա, սկսելով Կալիֆոռնիայից, մաքսատուրքային ընդվզումները զսպելու անվան տակ Ազգային պահակագնդեր (National guard) է ուղարկում տարբեր նահանգներ ու քաղաքներ՝ նույնիսկ Վաշինգտոն, Չիկագո եւ, օրերս, Պորտլենդ: Բոլորն էլ, ուշադրությո՛ւն, Դեմոկրատական կուսակցության անդամ նահանգապետերով ու քաղաքապետերով կառավարվող:
Եվ Ամերիկան Ամերիկա չէր լինի, եթե դատաիրավական ողջ համակարգը ոտքի չկանգներ: Ախր Մ. Նահանգների սահմանադրական օրենքով չի թույլատրվում որեւէ իշխանության, նույնիսկ՝ նախագահին, առանց տեղական նահանգային կամ քաղաքային իշխանությունների հրավերի զինվորական որեւէ ուժ ուղարկել խնդրո առարկա երկրամաս, շրջան ու քաղաք:
Եվ հենց դա՛ էր պատճառը, որ անցած կիրակի օրը դատարանը օրենքից դուրս եւ անօրինական հռչակեց նախագահի որոշումները ու պահանջեց իրենց զորանոցներ վերադարձնել զինված ուժերին:
Ստացվում է, որ Մ. Նահանգներում չկան «վնգստացող դատավորներ», հրաման կատարող Արմեն Դանիելյաններ, Արմինե Մելիքսեթյաններ, Սրբուհի Գալյաններ ու նրանց նմանները:
Երբ որեւէ երկրում գործում է արդարության եւ օրենքի վրա հիմնված դատական համակարգ, այդ երկիրը կլինի ուժեղ, ամուր եւ բարգավաճ, որքան էլ որ դժբախտաբեր նիկոլականությունը թափանցի այնտեղ:
ՀԱԿՈԲ ԱՎԵՏԻՔՅԱՆ
