«Գառնի» պատմամշակութային արգելոց-թանգարանի տարածքում` տաճարից 90 մետր հեռավորության վրա գալիք տարվա գարնանը կտեղադրվի սեզոնային սրճարան, որի մասին երեկ լրագրողների հետ հանդիպմանը հավաստիացրեց «Պատմամշակութային արգելոց-թանգարանների եւ պատմական միջավայրի պահպանության ծառայություն» ՊՈԱԿ-ի տնօրեն Վլադիմիր Պողոսյանը :
«Այն չի կառուցվելու, այլ տեղադրվելու է: Ունենալու է մետաղե ամրակներ, որոնցով ամրացվելու է, հետեւաբար շինարարություն արգելոցի տարածքում տեղի չի ունենալու: 2009թ. արգելոցի տարածքում գործում է գիշերային գեղարվեստական լուսավորություն, սակայն այցելուների թիվը Գառնիի հեթանոսական տաճար քիչ է: Իսկ սրճարանի առկայությունը կնպաստի արգելոց-թանգարանին հարակից տարածքում տարատեսակ միջոցառումներ կազմակերպել»:
Ըստ նրա, սրճարանը մոնումենտալ կառույց չի լինելու, այդ տարածքում կտեղադրվեն միայն սեղաններ, աթոռներ եւ ծածկ, որը, ըստ Պողոսյանի, կնպաստի զբոսաշրջիկների այցելություններին:
Նախնական տվյալներով, սրճարանում կմատուցվեն սուրճ, թեյ, թեթեւ սնունդ եւ տարածքի բնակիչների պատրաստած գաթա, մուրաբա, ինչպես նաեւ մրգեր:
Վլադիմիր Պողոսյանը հավաստիացնում է, որ ստացված եկամուտը կուղղվի «Գառնի» արգելոցի վերականգնման աշխատանքներին, ինչպես նաեւ կվերանորոգվի տաճար տանող ճանապարհը (սալահատակը):
Նրա հավաստմամբ, նախագծին աջակցում է ռուսաստանաբնակ Կարեն Մայիլյանը, ով 6 մլն դրամ կներդնի ծրագրի իրականացման համար, սակայն հետո սրճարանի շահագործման իրավունքը կստանձնի «Պատմամշակութային արգելոց-թանգարանների եւ պատմական միջավայրի պահպանության ծառայություն» ՊՈԱԿ-ը:
Հիշեցնենք, որ սրճարանի ծրագրի նկատմամբ օրերս դժգոհության ալիք է բարձրացել. հասարակական մի շարք կազմակերպություններ եւ, մասնավորապես, հայ արիական միաբանությունը այդ առթիվ խստիվ քննադատում է նախարարության թողտվությունը:
