Հայաստանը 2012 թվականից միացել է Ֆրանսիական «Ամենակարճ օր» կարճամետրաժ ֆիլմերի փառատոնին եւ արդեն երկրորդ անգամ հայ կինոսիրողները հնարավորություն կունենան շփվելու ֆրանսիական կինոյի բազմազանությանը, գույնին ու նորարարական մտքին:
Այդ փառատոնը խորհրդանշում է ձմեռվա գիշերահավասարի, տարվա ամենակարճ օրը դեկտեմբերի 21-ը:
«Նաիրի» կինոթատրոնում դեկտեմբերի 11-ին մեկնարկեց «Ամենակարճ օր» ֆրանսիական կարճամետրաժ կինոյի տոնը: Այդ ֆիլմերի ցուցադրությունը Հայաստանում իրականացվում է երկկողմ համագործակցության համաձայնագրի շրջանակներում:
Կարճամետրաժ կինոյի տոնը ներառում է 1-59 րոպե տեւողությամբ բոլոր ժանրերի ֆիլմերը: Ֆրանսիայում այդ օրը ամեն տարի հանրային վայրերում ցուցադրվում են հարյուրավոր ֆիլմեր, իսկ աշխարհի հինգ տասնյակից ավելի երկրներ արդեն միացել են այս կինոծրագրին եւ ամեն տարի մասնակիցների թիվը մեծանում է: Բոլոր երկրների համար ֆիլմերը ընտրվում են «Կարճամետրաժ ֆիլմերի գործակալության» ֆիլմադարանից, եւ քանի որ Հայաստանում այս հաստատությունը գրասենյակ չունի, ուստի փառատոնը կազմակերպվել է Հայաստանում Ֆրանսիայի դեսպանության մշակութային օպերատոր հանդիսացող «Ալիանս Ֆրանսեզ» կազմակերպության հետ համատեղ, իսկ ֆիլմերի եւ գովազդային նյութերի պատվիրելը եւ ամրագրելը կատարվել են Հայաստանում Ֆրանսիայի դեսպանության միջոցով: Ծրագրի կազմակերպիչներն են Հայաստանի ազգային կինոկենտրոնը, Հայաստանի Ալիանս Ֆրանսեզը, ՀՀ-ում Ֆրանսիայի դեսպանությունը, Ֆրանսիայի արտգործնախարարության մշակութային օպերատոր` Ֆրանսիական ինստիտուտը, Ֆրանսիայի ազգային կինոյի եւ անիմացիայի կենտրոնը եւ կարճամետրաժ կինոյի գործակալությունը:
Երեւանում ֆիլմերը կցուցադրվեն «Նաիրի» կինոթատրոնում, «Նարեկացի» արվեստի միությունում, մայրաքաղաքի բուհերում եւ համայնքներում, ՀՀ մարզերում:
Տասն օր հիշյալ վայրերում (դեկտեմբերի11-21-ը) կիրականացվեն ֆրասիական ֆիլմերի անվճար ցուցադրություններ: Իսկ չթարգմանված եւ համր ֆիլմերը դեկտեմբերի 14-ից-21-ը հնարավոր է դիտել առցանց www. alliancefr.am կայքում:
