Մասաչուսեթսի Հայ դատի հանձնախումբը (ՄՀԴՀ) հաղորդագրություն է հրապարակել, որով ողջունում է կոնգրեսական Ջոզեֆ Քենեդիի (դեմոկրատՙ Մասաչուսեթսից) որոշումըՙ պաշտպանելու Ներկայացուցիչների պալատի 227 բանաձեւը: Հայերի ցեղասպանության վերաբերյալ ճշմարտությունը ասելու եւ արդարություն ցուցաբերելու բանաձեւը կոչ է ուղղված Մ. Նահանգների կառավարությանըՙ վերջ դնելու Թուրքիայի ժխտողական քաղաքականությանը մեղսակից լինելուն ու արդարության եւ ճշմարտության ճանապարհը բռնելու:
ՄՀԴՀ-ի գործուն անդամներից Գրեգ Քանարյանն ու Ջոն Դաղլյանը, միանալով Հայ դատի արեւելյան շրջանի վարչության անդամ Սթիվ Մեսրոպյանին, նոյեմբերի 26-ին հանդիպում են ունեցել Ջոզեֆ Քենեդիի հետ, որի ընթացքում խոսել են մի շարք հրատապ թեմաներից: Ջ. Քենեդին ծանոթ է հայկական հարցերի (227 բանաձեւի, որբերի հյուսած գորգի, Թուրքիայի հայկական եկեղեցիների ճակատագրի, ղարաբաղյան խնդրի, Մ. Նահանգներ-Հայաստան հարաբերությունների) վերաբերյալ ունեցած իր դրական կողմնորոշումով:
«Մենք ուրախ ենք, որ շարունակելով իր ընտանիքի ազնվագույն ոգինՙ Ջոզեֆ Քենեդին որոշել է պաշտպանել 227 բանաձեւը: Մենք սիրով կշարունակենք աշխատել նրա հետ», ասել է այդ առթիվ Սթիվ Մեսրոպյանը:
