Վարչապետի եւ էկոնոմիկայի նախարարի անդրադարձն ու բացատրությունները
Կառավարության երեկվա նիստից առաջ վարչապետ Տիգրան Սարգսյանն անդրադարձել է կառավարության շենքի առջեւ Երեւանի «Ոսկու շուկայի» աշխատողների բողոքի ակցիային, որը տեղի էր ունեցել նախորդ հինգշաբթի:
«Ոսկու շուկայի աշխատակիցները, կառավարության շենքի մոտ պարբերաբար ցույցեր են կազմակերպում, եւ բողոքի պատճառները շատ տարբեր են: Ես ծանոթացել եմ տեղեկանքին, որն ինձ ներկայացրել է էկոնոմիկայի նախարարության շուկաների վերահսկողության տեսչությունը: Այն տեղեկատվությունը, որը զետեղված է այդ տեղեկանքի մեջ, բացարձակապես չի համապատասխանում ԶԼՄ-ների տարածած տեղեկությանը: Միեւնույն ժամանակ, տեսչության պետն ինձ հայտնեց, որ պետական ծրագրով դեկտեմբերի տասին նրանք պլանավորում են համալիր ստուգում իրականացնել ոսկու շուկայում: Մենք որդեգրել ենք այն սկզբունքը, որ տեսչական ստուգման ժամանակ նվազագույնի հասցնենք տնտեսվարող սուբյեկտին պատճառվող անհարմարությունները: Հաշվի առնելով այս հանգամանքըՙ մեր տարբեր տեսչական մարմինների գործողությունները պետք է համադրելի դարձնենք, որ այնտեղ հաճախակի ստուգում չանենք», ասաց վարչապետը: Նրա ներկայացմամբ, ոսկու շուկայի աշխատակիցները բողոքում են աշխատանքային պայմաններից, այնտեղ ստեղծված հակահրդեհային եւ սանիտարական վիճակից, հաճախորդները` որ ձեռք են բերում իրեր, որոնց վրա դրոշմ չկա, որոնց որակի վերաբերյալ կան լուրջ կասկածներ:
«Հանձնարարում եմ էկոնոմիկայի նախարարության շուկաների վերահսկողության տեսչությանը, առողջապահության նախարարության տեսչություններին եւ գործակալություններին, արտակարգ իրավիճակների նախարարության տեսչությանը, պետական եկամուտների կոմիտեին, որ համատեղ ծրագրով սկսեն այդ ստուգումը, որ ծրագրված է էկոնոմիկայի նախարարության շուկաների վերահսկողության տեսչության կողմից, որպեսզի նրանք գործ ունենան ստուգման մեկ գործընթացի հետ, եւ մենք վերջնականապես հասկանանք, թե ինչո՞ւ են մեր քաղաքացիները պարբերաբար բողոքում, որպեսզի հասկանանք, թե ի՞նչ է կատարվում այդ շուկայում, ի՞նչ ռիսկեր կան», նշեց Տիգրան Սարգսյանը:
Այս հարցի վերաբերյալ լրագրողներին որոշակի պարզաբանումներ տվեց նաեւ էկոնոմիկայի նախարար Վահրամ Ավանեսյանը : Նա նշեց, որ տուգանքների չափը չի կարող գերազանցել 50 հազար դրամը: Տուգանվում են այն տնտեսվարողները, որոնց վաճառված ոսկեղենի վրա հարգադրոշմ չի լինում: «Չկա նման բան, որ զարդի վրա հարգորոշումը լավ չերեւա ու դրա համար մարդկանց տուգանեն: Տուգանքներ նշանակված են եղել միայն այն ժամանակ, երբ կնիքներից որեւէ մեկը բացակայել է», ընդգծեց նախարարը: Նրա խոսքերով, հարգադրոշմող կազմակերպությունների մոտ նույնպես ստուգումներ են իրականացվում, եւ եթե նրանք չեն կարողանում նորմալ հարգադրոշմում իրականացնել, նույնպես տուգանվում են:
Վահրամ Ավանեսյանը կարեւորեց պլանային ստուգումների իրականացումը, որպեսզի մի կողմից` արտադրողներն ու վաճառողները, մյուս կողմից` գնորդները հավասար պայմաններում լինեն: «Չեմ կարծում, որ Հայաստանում որեւէ մեկը կցանկանա ոսկու շուկայից ապրանք գնել, որը չլինի ոսկի, կամ լինի ավելի ցածր հարգադրոշման ոսկի: Հարգադրոշման կնիք խփելը 100-300 դրամ արժե, իսկ տուգանքները` 50 հազար դրամ: Հարգադրոշմներ խփելը բավական էժան ծախս է` համեմատած տվյալ արտադրանքին», շեշտեց էկոնոմիկայի նախարարը:
