Մեծ Բրիտանիան, ԱՄՆ-ը եւ նրանց մի շարք դաշնակիցներ օրերս Անկարայում առաջին անգամ անմիջական բանակցություններ են վարել սիրիացի իսլամիստների հետ: Բրիտանական «Թելեգրաֆ» թերթը հաղորդում է, որ նախագահ Բաշար Ասադի արտասահմանյան հակառակորդները փորձում են շփումներ հաստատել իսլամիստների հետ, քանի որ ընդդիմությունը կորցնում է ազդեցությունը Սիրիայում:
Անկարայի հանդիպմանը մասնակցել են «Սիրիայի բարեկամներ» խմբի երկրների, մասնավորապեսՙ հանդիպման կազմակերպիչներ Թուրքիայի եւ Քաթարի ներկայացուցիչներ: Սիրիական կողմից մասնակցել են իսլամիստ արմատականների, այդ թվումՙ նոր «Իսլամական ճակատի» մեջ միավորված իսլամիստների ներկայացուցիչներ:
Արեւմուտքը եւ նրա տարածաշրջանային դաշնակիցները հույս ունեն, որ իսլամիստների մի մասը կհամաձայնի դաշինք կնքել չափավորական ապստամբական ուժերիՙ «ազատ սիրիական բանակի» եւ աշխարհիկ ընդդիմության «Սիրիական ազգային կոալիցիայի» հետ:
Անկարայի բանակցությունների վերաբերյալ համանման տեղեկություններ է հաղորդում նաեւ ամերիկյան «Ուոլ Սթրիթ ջոռնըլ» թերթը:
«Իսլամական ճակատի» կազմում կա առնվազն վեց հայտնի խմբավորում: Դրանցից մեկըՙ «Ահրար ալ Շամը», անցյալում մեղադրվել է խաղաղ բնակիչների սպանությունների եւ ահաբեկչական «Ան Նուսրա ճակատի» հետ համագործակցելու մեջ:
Թե բանակցություններից հետո ինչպես է զարգացել «Իսլամական ճակատի» եւ «Բարձրագույն ռազմական խորհրդի» համագործակցությունըՙ հայտնի չէ: «Թելեգրաֆը» հաղորդում է միայն, որ իսլամիստների նոր կոալիցիայի ֆինանսավորմամբ եւ սպառազինմամբ սկսել է ակտիվորեն զբաղվել Սաուդյան Արաբիան, որը «Սիրիայի բարեկամների» կազմում մասնակցում էր Անկարայի բանակցություններին:
