Օրական կատարվում է մոտ 5 մլրդ գրանցում
Ամերիկյան հատուկ ծառայություններից մեկըՙ Ազգային անվտանգության գործակալությունը (ԱԱԳ) հետեւում է ամբողջ աշխարհում բջջային հեռախոսների տերերի տեղաշարժերին եւ բացահայտում նրանց կապերը: «Վաշինգտոն փոստ» թերթը դեկտեմբերի 5-ի համարում գրում է, որ այդ են վկայում ԱԱԳ եւ ԿՀՎ նախկին աշխատակից Էդվարդ Սնոուդենի տրամադրած գաղտնի փաստաթղթերը:
Թերթի տվյալների համաձայն` ԱԱԳ-ն ամեն օր բջջային հեռախոսների տեղաշարժերի վերաբերյալ մոտ 5 մլրդ գրանցում է կատարում: Գործակալության տվյալների բազայում տեղեկություններ կան հարյուրմիլիոնավոր սարքերի գտնվելու վայրերի մասին: Աշխարհի տարբեր երկրներում բջջային հեռախոսների տեղաշարժմանն առնչվող տվյալների «վիթխարի ծավալների» մասին թերթին հայտնել է նաեւ ԱԱԳ մի անանուն աշխատակից, որը մասնակցում է տվյալ ծրագրին եւ խոսել է ԱԱԳ-ի համաձայնությունն ստանալուց հետո միայն:
Ընդսմին նշվում է, որ թեեւ ծրագիրն ուղղված չէ ԱՄՆ քաղաքացիների հեռախոսների գաղտնալսմանը, դա «ակամա» կարող է տեղի ունենալ: Բացի դրանից, տվյալների բազայում տեղեկություններ են ստացվում արտերկիր մեկնող տասնյակ միլիոնավոր ամերիկացիների վերաբերյալ:
Համացանցից օգտվողների եւ դիվանագետների լրտեսմանը վերաբերող եւ մյուս գաղտնի նյութերը մամուլում հրապարակվում են այս տարվա հունիսից: ԱՄՆ-ում Սնոուդենի նկատմամբ քրեական գործ է հարուցված պետական գաղտնիքի հրապարակման մեղադրանքով: Նա ժամանակավոր ապաստան է գտել Ռուսաստանում:
