Դր. Ասպետ Այնթապլյան (փոխնախագահ)
Վահան Բալայան (քարտուղար)
Նարդոս Հարությունյան (գանձապահ)
Արդեն մի քանի շաբաթ է, որ ԳԿԽ-ն տառապում է ԳԿԽ-ի նախագահՙ Ազատ Օրդուխանյանի վտանգավոր կողմնորոշումներից, աշխատաձեւից եւ դրանցից բխած անառողջ եւ խառնաշփոթ մթնոլորտից: Վերջերս հայաստանյան մամուլի մեջ նա տարածել է մի շարք անստույգ լուրեր, որոնք շփոթեցրել են հայ հասարակությանը, առավել պառակտելով եւ անախորժ մթնոլորտ ստեղծելով գերմանահայ համայնքի ներքին կյանքում: Մի շարք լրատվամիջոցներում տեղ են գտել միակողմանի եւ բացարձակապես անձնական գովազդին ծառայող ստեր: Չի ճշտվել լրատվության աղբյուրի հավաստիությունը: Ամենացավալին մեզ համար այն է, որ նաեւ որոշ առողջ ու նվիրյալ ուժեր, դեռեւս ըստ էության անտեղյակ իրական խնդրո առարկային, նպաստում են նրա ինքնագովազդին ու քայքայիչ գործունեությանը: Հետեւաբար անհրաժեշտ ենք համարում հանդես գալ մի շարք պարզաբանումներով եւ մեզ հայտնի անհերքելի փաստերով:
Մենք համոզված ենք, որ գերմանահայության մեծամասնության կարծիքով վերջին շրջանում ԳԿԽ-ի վարկաբեկման գլխավոր պատճառը եղել են նույն ինքը պրն Օրդուխանյանը եւ իր գործելաոճը: Նա բազմիցս ապացուցել է իր անկարողությունըՙ իր վարած հարաբերություններով ու գործելաոճով, լինի դա իր վարչական գործընկերների հետ կամ համայնքում աշխատող հայկական հաստատությունների, միությունների, կազմակերպությունների եւ անդամների հետ: Նա վարել է քայքայիչ աշխատաոճ, եղել է փոքրոգի, եսակենտրոն, աշխատանքների եւ որոշումների մեջ չի համագործակցել վարչության մյուս անդամների հետ, նկատի չի ունեցել նրանց կարծիքներն ու առաջարկները եւ արհամարհել է ԳԿԽ վարչության մեծամասնության որոշումները, ինչի իրավունքը չուներ: Առանց վարչության մեծամասնության կարծիքը հաշվի առնելուՙ ինքնագլուխ կնքել է անհասկանալի արկածախնդիր եւ ոչ թափանցիկ հարաբերություններ այլ կազմակերպություննեի հետ: Որպես նրա ինքնագլխության վերջին ապացույց կարող է դիտվել լիագումար նիստ հրավիրելու նրա փորձը, որի իրավունքը նա կանոնադրությամբ չուներ, քանի որ ԳԿԽ վարչության մեծամասնությունը նման ամսաթվով ու նշված վայրում նման նիստ հրավիրելու նրա առաջարկին դեմ էր քվեարկել: Այսինքն տվյալ դեպքում մենք գործ ունենք ոչ թե, ինչպես պրն Օրդուխանյանն է փորձում ներկայացնել, Հայաստանի Հանրապետությունից, դեսպանատնից կամ այլ իրական կամ մտացածին ուժերից եկող ճնշումների հետ, այլ ԳԿԽ-ի կանոնակարգի խախտումների ու ներքին տարաձայնությունների հետ:
Գաղտնիք չէ, որ գերմանահայությունն այսօր կանգնած է շատ լուրջ մարտահրավերների առջեւՙ ներքին համայնքային գոյատեւման եւ վերաշխուժացման խնդիրները, Հայոց ցեղասպանության հարյուրամյակը, Արցախյան հիմնահարցի գծով անելիքները շարունակում են մնալ մեզ համար լուրջ մտահոգություններ: Այդ բոլորի հետ մեկտեղ այսօր մենք կանգնած ենք պառակտված ԳԿԽ-ով եւ անկարող ու ինքնագլուխ գործող նախագահով:
Գերմանահայությունը հրատապ կարիք ունի խմբական ոգով աշխատող, վարչական կարողականությամբ օժտված եւ շրջահայաց ղեկավարության, որը ի վիճակի կլինի վերջ դնելու ստեղծված խառնաշփոթությանն ու վերահաստատելու հայ հասարակության վստահությունն ու հավատը:
Ազատ Օրդուխանյանի տարածած անստույգ լուրերն ու վարկածները ոչ մի փաստաքննության չեն դիմանա: Իրականում ԳԿԽ-ի մեջ չկան մութ ձեռքեր կամ գաղտնի կազմակերպություններ, որոնք իբր թե իրեն ճնշման են ենթարկում: Իրականությունը շատ ավելի պարզ է: Խնդիրը միայն ու միայն ներքին է, ուր պրն Օրդուխանյանը, կորցրած լինելով իր հեղինակությունը, փորձում է արտաքին ուժերի վերագրել այն եւ իրեն թիրախի դերում ներկայացնել:
ԳԿԽ-ի դռները միշտ բաց են եղել ամեն հայի կամ հայ միության ու կազմակերպության առջեւ, որոնք ընդունում են ԳԿԽ-ի կանոնադրությունն ու պատրաստ են նրա հետ համագործակցել: Վարչությունը պիտի կարողանա այս բոլորին միավորել, նրանց հետ համագործակցելու ելք գտնել, նրանց աշխատանքների մեջ ներառել եւ հարկ եղած դեպքում նույնիսկ քննադատություններ լսել եւ համապատասխան որոշումներ ընդունել:
Արդ, վերջին խոսքը պատկանում է ԳԿԽ-ի ընդհանուր ժողովին, որն, ըստ վարչության մեծամասնական քվեով գոյացած որոշման, տեղի կունենա:
Գերմանահայոց կենտրոնական խորհրդի վարչության անդամներ`
