Երեկ Թուրքիայի Անթալիա քաղաքում մեկնարկեց շախմատի աշխարհի թիմային առաջնությունը: 10 հավաքականներ սկսեցին պայքարն աշխարհի չեմպիոնի տիտղոսի համար, որը ներկայումս պատկանում է Հայաստանի հավաքականին: Մեր ընտրանին իր միջին վարկանիշով (2715) 2-3-րդ տեղերն է բաժանում ուկրաինացիների հետ: Իսկ ամենաբարձր վարկանիշն ունեն ռուսները (2759), որոնց հետ էլ մեկնարկային տուրում մրցեցին մեր շախմատիստները:
Հայաստանի հավաքականին վիճակահանությամբ բաժին է ընկել 6-րդ համարը: Բուքմեյքերները Հայաստան-Ռուսաստան մրցախաղում նախապատվությունը տալիս էին ռուսներին, որոնց հաղթանակը գնահատվել էր 1,94 գործակցով, իսկ հայերինըՙ 4,5: Ոչ-ոքիի գործակիցը 2,62 էր:
Առաջինն իր մրցախաղն ավարտեց Գաբրիել Սարգսյանը` 41-րդ քայլին հաշտություն կնքելով Յան Նեպոմնյաշչու հետ: Քիչ անց նրա օրինակին հետեւեցին Լեւոն Արոնյանն ու Վլադիմիր Կրամնիկը, Սերգեյ Մովսիսյանն ու Սերգեյ Կարյակինը: Մրցախաղի ելքը պետք է վճռեր Վլադիմիր Հակոբյանի եւ Ալեքսանդր Գրիշչուկի մրցավեճը: Նավակային վերջնախաղում թեեւ Գրիշչուկը մեկ զինվոր ավելի ուներ, սակայն պարտիան 87-րդ քայլին ավարտվեց ոչ-ոքի:
Այսօր կայանալիք 2-րդ տուրում Հայաստանի հավաքականը կմրցի Եգիպտոսի ընտրանու հետ, որը 1,5-2,5 հաշվով պարտվեց գերմանացիներին: ԱՄՆ-ի հավաքականը 1,5-2,5 հաշվով զիջեց ուկրաինացիներին: ԱՄՆ-ի կազմում Վարուժան Հակոբյանը 4-րդ խաղատախտակի վրա ոչ-ոքի խաղաց Յուրի Կրիվորուչկոյի հետ: Չինաստանը 2,5-1,5 հաշվով հաղթեց հոլանդացիներին, Ադրբեջանը նույնպիսի արդյունքով առավելության հասավ թուրքերի նկատմամբ:
