2000 թվականից մինչեւ օրս գերմանական 22 համալսարաններ եւ գիտահետազոտական ինստիտուտներ դրամաշնորհների տեսքով ընդհանուր առմամբ մոտ 10 մլն դոլար են ստացել ԱՄՆ պաշտպանության նախարարությունից, հաղորդում է գերմանական «Դի Վելթ» թերթը: Պենտագոնը վճարել է ինչպես հիմնարար (ֆունդամենտալ) հետազոտությունների, այնպես էլ ռազմական տեխնոլոգիաների ասպարեզում կատարված աշխատանքների դիմաց: Պենտագոնից դրամաշնորհներ ստացել են նույնիսկ այն համալսարանները, որոնք համապատասխան փաստաթղթերի ստորագրումից հետո հրաժարվել են ռազմական հետազոտություններ անցկացնել բուհի ներսում:
Մյունխենի Լյուդվիգ-Մաքսիմիլիան համալսարանը 2012 թ. ավելի քան 470 հազար դոլար դրամական օժանդակություն է ստացել պայթուցիկ նյութերի մարտական հատկանիշների բարելավման ոլորտում կատարած հետազոտությունների համար, հաղորդում է թերթը: Ֆրաունհոֆերի անվան ընկերությունը (կիրառական հետազոտությունների ինստիտուտների միավորում) ամերիկյան բանակի համար մշակել է նոր զրահապատ ապակի եւ մարտագլխիկներ, Մարբուրգի համալսարանն աշխատել է ամերիկյան անօդաչու ինքնաթիռների տարածական կողմնորոշման համակարգերի եւ «կառավարելի ճշգրիտ զինամթերքների» վրա:
Պենտագոնի եւ գերմանական բուհերի կնքած պայմանագրերի ընդհանուր գումարը կազմել է ավելի քան 9,4 մլն դոլար: Այդ բուհերի թվում են Մաքս Պլանկի ինստիտուտը, Ֆրաունհոֆերի ընկերությունը, Ալֆրեդ Վեգեների անվան բեւեռային եւ ծովային հետազոտությունների ինստիտուտը եւ Լայբնիցի անվան Կենտրոնական ու Արեւելյան Եվրոպայի ագրարային զարգացման ինստիտուտը:
