Ֆուտբոլի Հայաստանի երիտասարդական հավաքականը չափազանց անհաջող անցկացրեց Եվրոպայի առաջնության ընտրական հերթական մրցախաղը Թուլուզումՙ 0-6 հաշվով ջախջախիչ պարտություն կրելով ֆրանսիացիներից, որոնք հոկտեմբերին Երեւանում էլ հաղթել էին խոշոր հաշվով (4-1):
Դեռեւս առաջին խաղակեսում Մարտյալը, Լանդրն ու Տովենը 3 անգամ գրավեցին Հայաստանի հավաքականի դարպասը: Ընդմիջումից հետո Տովենը եւս 2 գոլ խփեց, իսկ հանդիպման վերջնակետը դրեց Ալլեն:
Այսպիսով, երիտասարդական հավաքականի գլխավոր մարզչի պաշտոնում Աբրահամ Խաշմանյանի նորամուտը շատ անհաջող անցավ: Սակայն մարզչին մեղադրել չի կարելի, քանի որ Խաշմանյանն ընդամենը 2 օր է շփվել հավաքականի ֆուտբոլիստների հետ, որոնց մեծամասնությունը «Փյունիկից» են:
Հայաստանի երիտասարդական հավաքականը 5 խաղից հետո 3 միավորով նախավերջինՙ 4-րդ տեղում է: Իսկ Ֆրանսիայի ընտրանին 15 միավորով միանձնյա առաջատարն է:
Նոյեմբերի 19-ին մեր երիտասարդական հավաքականը հյուրընկալվելիս ուժերը կչափի բելառուսների հետ, որոնք 3 միավորով եզրափակում են ընտրական 10-րդ խմբի մրցաշարային աղյուսակը:
