«Ազգը» հոկտեմբերի 26-ի համարում արդեն տեղեկացրել էր իր ընթերցողներին, որ Կատյա Մինաս Փելթեկյանի խմբագրությամբ Անգլիայում լույս էր ընծայվել երկու գիրքՙ «Հայոց ցեղասպանության ժամանակաշրջանը: Հաղորդագրություններ բրիտանական մամուլում: 1914-1923 թթ.» ընդհանուր խորագրով (The Times of the Armenian Genocide: Reports in the British Press (1914-1923)):
Այժմ Լոնդոնի Թեքեյանի մշակութային միության հաղորդագրությունից տեղեկանում ենք, որ նոյեմբերի 22-ին Չենիստոն Գարդընզում (Լոնդոն) գտնվող «Հայ տուն» կենտրոնում տեղի է ունենալու նշյալ 2 գրքերի շնորհանդեսը:
Կատյա Փելթեկյանը սահապատկերների (սլայդների) միջոցով ներկայացնելու է նմուշներ այն հազարից ավելի հոդվածներից եւ հաղորդագրություններից, որոնք ժամանակին լույս են տեսել բրիտանական մամուլում:
ԹՄՄ-ից ստացված հաղորդագրությունը նշում է, որ ճիշտ է, մինչ այդ հատորները եղել են այլ գրքեր (օրինակ «Կապույտ գիրքը» կամ Բրիտանական խորհրդարանական գիրքը հեղինակությամբ Ջեյմս Բրայսի եւ Առնոլդ Թոյնբիի), բայց դրանք սահմանափակվել են 1915-1916 թվերի իրադարձությունները ներկայացնելով, մինչդեռ Փելթեկյանի 2 նոր հատորները ընդգրկում են 1914-1923 թվականները: Առաջին հատորը (450 էջ) ներառում է 1914-1919 ժամանակահատվածը, իսկ երկրորդը (526 էջ)ՙ 1920-1923 շրջանը: Դրանք ուսումնասիրողների համար նորանոր հեռանկարներ են բացում, քանի որ այդ ժամանակաշրջանի բրիտանական մամուլը քիչ է հետազոտության նյութ դարձել:
