Երեկ խորհրդարանական մեծամասնությունը տապալեց ընդդիմադիր խմբակցությունների միասնաբար հրավիրած արտահերթ նիստը, որի թեման կենսաթոշակային բարեփոխված օրենքից կուտակային բաղադրիչի հետաձգումն էր մեկ տարով: Ժամը 12:00ին քվորում չկար` 45 պատգամավոր էր գրանցված, կոալիցիոն երկու խմբակցությունները փոխադարձ համաձայնությամբ բոյկոտել էին նիստը, իսկ արդեն կանոնակարգով սահմանված երեք ժամից հետո, երբ քվորում չի լինում, նիստը հայտարարվում է չկայացած: Ժամը 15-ին միայն 50 պատգամավոր էր գրանցված: Երեկ այս մասին պարզաբանումներ տված ՀՀԿ խմբակցության նախագահ Գալուստ Սահակյանին լրագրողը հարց էր ուղղել, թե արդյոք ՀՀԿ-ն բոյկոտե՞լ է նիստը, քանի որ մասնակցելու է ՀՀԿ-ական Վարդան Այվազյանի դստեր հարսանիքին: Գալուստ Սահակյանի բացատրությամբ` նախապես իրենք չէին բոյկոտելու նիստը, սակայն երբ հայտնի է դարձել, որ ընդդիմությունը պատրաստվում է բովադակային քննարկում անցկացնել, իրենք բոյկոտի որոշում են կայացրել:
Ընդդիմությունն էլ սա ընկալեց որպես վախ, որ քննարկումը կբացահայտի օրենքի թերությունները, որոնցից կարեւորն ըստ ընդդիմության այն է, որ մարդիկ պատրաստ չեն աշխատավարձերից այս նոր տեսակի պահումներին, կառույցները պատրաստ չեն տեխնիկապես իրականացնելու այս բաղադրիչի կիրառումը, եւ կասկածներ կան, որ այս գումարներով նոր տարում բյուջե են լցնելու:
Ի դեպ,` Ազգային ժողովի մոտ բողոքում էին կուտակային համակարգին դեմ ակտիվիստները, ովքեր համացանցում «Ընդդեմ կենսաթոշակային պարտադիր վճարումների» խումբ են կազմել: Նրանք, նրանց հետ ել ընդդիմության ներկայացուցիչներ, ավելի ուշ շարժվեցին դեպի ՀՀԿ գրասենյակ, պահանջելով մեծամասնությունից մինչեւ ժամը 15-ը ներկայանալ ԱԺ եւ քվորում ապահովել, ինչպես նաեւ պահանջագիր հանձնեցին ՀՀԿ գրասենյակ:
Ավելի ուշ արտահերթ նիստ նախաձեռնած խմբակցություններն ու անկախ պատգամավորները հայտարարություն տարածեցին, ուր քաղաքական մեծամասնության կեցվածքը գնահատված էր «որպես բացահայտ արհամարհանք սահմանադրության նկատմամբ, քաղաքական փոքրամասնության սահմանադրական իրավունքներն իրացնելու հնարավորությունը ի չիք դարձնող եւ բաց քննարկումներից խուսափելու քայլ, անհանդուրժողականության դրսեւորում, Ազգային ժողովի դերը նսեմացնելու հերթական փորձ» եւ հաստատակամություն էր հայտնված` նոր ստորագրահավաքով արտահերթ նիստ հրավիրելու եւ պայքարի այլ միջոցներ կիրառելու մասին պարտադիր կուտակային բաղադրիչը օրենքից հետաձգելու համար:
