Շախմատի Եվրոպայի թիմային առաջնության 5-րդ տուրում Հայաստանի տղամարդկանց հավաքականը 3-1 հաշվով հաղթեց Սլովենիայի ընտրանուն: Մեր թիմի հաղթանակն ապահովեցին Լեւոն Արոնյանն ու Վլադիմիր Հակոբյանըՙ պարտության մատնելով համապատասխանաբար Դուսկո Պավասովիչին եւ Յուրե Սկոբեռնեին: Մեր թիմի ամենափորձառու գրոսմայստեր Վլադիմիր Հակոբյանն առաջին պարտիան անցկացրեց: Նրան հնարավորություն էր ընձեռվել հանգստանալու, քանի որ Եվրոպայի առաջնության ավարտից մեկ շաբաթ անց մեկնարկելու է աշխարհի թիմային առաջնությունը: Սերգեյ Մովսիսյանն ու Գաբրիել Սարգսյանը հաշտություն կնքեցին համապատասխանաբար Լուկա Լենիչի եւ Յուրե Բորիսեկի հետ:
Այս հաղթանակի շնորհիվ Հայաստանի հավաքականը 7 միավորով բարձրացավ 10-րդ հորիզոնական: Առաջատարը Ֆրանսիայի ընտրանին է, որը ոչ-ոքի խաղալով հունգարացիների հետ, վաստակեց 9 միավոր: 8-ական միավորով առաջատարին հետապնդում են Հունաստանի, Վրաստանի եւ Ադրբեջանի հավաքականները: Ահա գրանցված մի քանի ուշագրավ արդյունքներ. Չեխիա-Ադրբեջանՙ 1,5-2,5, Բելառուս-Հունաստանՙ 1-3, Սերբիա-Խորվաթիաՙ 2-2, Իսրայել-Վրաստանՙ 0,5-3,5, Իտալիա-Ռուսաստանՙ 0,5-3,5:
6-րդ տուրում հայ շախմատիստները կմրցեն 7 միավոր ունեցող հունգարացիների հետ: Ուշադրության են արժանի նաեւ Հունաստան-Ֆրանսիա, Վրաստան-Ադրբեջան, Ռուսաստան-Ռումինիա, Անգլիա-Ուկրաինա մրցախաղերը:
Շախմատի Հայաստանի կանանց հավաքականը ոչ-ոքի խաղաց ուժեղ կազմ ունեցող Վրաստանի ընտրանու հետ: Էլինա Դանիելյանը 2-րդ հաղթանակը տոնեց Նանա Ձագնիձեի հետ մրցավեճում: Իսկ ահա Մարիա Կուրսովան պարտվեց Բելա Խոթենաշվիլուն: Մկրտչյանն ու Գալոյանը հաշտություն կնքեցին համապատասխանաբար Մերի Արաբիձեի ու Նինո Խուրցիձեի հետ:
6 տուրից հետո Հայաստանի հավաքականը 7 միավորով 4-րդ տեղում է: 10 միավորով առաջատարն Ուկրաինայի հավաքականն է, որը 5-րդ անընդմեջ հաղթանակը տոնեց լեհերի հետ մրցավեճում (3,5-0,5): 8-ական միավոր ունեն լեհերն ու վրացիները: Հայաստանի հետ 7-ական միավոր են վաստակել նաեւ Ռուսաստանը, Իսպանիան, Գերմանիան եւ Լեհաստանի 3-րդ հավաքականը: Ահա մի քանի ուշագրավ արդյունքներ. Ռուսաստան-Գերմանիաՙ 2-2, Սերբիա-Իսպանիաՙ 1,5-2,5, Հոլանդիա-Ռումինիաՙ 2-2, Լեհաստան-3-Իսրայելՙ 3-1, Ֆրանսիա-Ադրբեջանՙ 1,5-2,5: 6-րդ տուրում հայ շախմատիստուհիները կմրցեն իսպանուհիների հետ:
