Վ. Պ.
ԵԱՀԿ Մինսկի խմբի համանախագահները կրկին տարածաշրջանում են ու այս անգամ եկել են Հայաստանի ու Ադրբեջանի նախագահների ապագա հանդիպման նախապատրաստման հույսով ու առաքելությամբ:
Ադրբեջանական «Ազերիպրես» գործակալության հաղորդմամբՙ երեկ Բաքվում համանախագահներ Իգոր Պոպովը, Ջեյմս Ուորլիքն ու Ժակ Ֆորը հանդիպել են Ադրբեջանի նախագահ Իլհամ Ալիեւի հետ, որից հետո ռուսաստանցի համանախագահն արել է հայտարարություն, թե Ալիեւ կրտսերը համաձայնություն է տվել «հայ գործընկերոջ հետ հանդիպման համար»:
Ընդ որում, հանդիպումը, ըստ նույն Իգոր Պոպովի, ծրագրվում է անցկացնել մինչեւ այս տարեվերջ: Ու եթե հաշվի առնենք, որ դեռ այս ընթացքում նոյեմբերի 28-29-ին էլ Վիլնյուսում Արեւելյան գործընկերության գագաթաժողովն է անցկացվելու, ապա Հայաստանի ու Ադրբեջանի նախագահների հանդիպում նախապատրաստելու համար իրականում մնում է դեկտեմբերը:
Նույն աղբյուրները տեղեկացնում են, որ հենց երեկ էլ համանախագահները մեկնել են Երեւան` նույն առաքելության շրջանակներում հանդիպում ունենալու Հայաստանի նախագահի հետ: Եվ քանի որ ցայսօր որեւէ պարագայում Հայաստանը չի հրաժարվել բանակցային գործընթացը շարունակելու առաջարկներից, ավելին, չի խոչընդոտել ԵԱՀԿ Մինսկի խմբի համանախագահների աշխատանքներին, կարելի է վստահությամբ ասել, որ Սերժ Սարգսյանը եւս կտա հանդիպման համար իր համաձայնությունը:
Միեւնույն ժամանակ, թերեւս ելնելով տարածաշրջանային այս այցելության` Հայաստանի ու Ադրբեջանի նախագահների հանդիպում կազմակերպելու առաքելությունից, համանախագահները չեն ծրագրում այցելել Ստեփանակերտ:
Ամեն դեպքում, համանախագահները Երեւանում հանդիպումից հետո հայտարարություն են անելու, որում թերեւս տեղ չգտնի, ինչպես միշտ, որեւէ խոսք ու գնահատական այն մասին, որ Ադրբեջանի նախագահը մի կողմից համաձայնություն է տալիս բանակցություններ շարունակելու համար պատրաստվող հանդիպմանը, մյուս կողմից, հերթական անգամ, սահմանին կրակոցներ են հնչում, այն էլ գյուղական դպրոցի ուղղությամբ: Ու թեեւ, Հայաստանի պաշտպանության նախարարության համաձայն, տուժածներ չկան Բարեկամավան գյուղի դպրոցի ուղղությամբ արձակված կրակոցներից, ակնհայտ է, որ ադրբեջանական ոճը մնում է նույնը. տարածաշրջանային բարձրաստիճան, կարեւոր այցերը հարեւանները «պատվում են» սադրանքներով:
«Խաղաղության չարաշահումն ավելի վտանգավոր է պարտված ժողովրդի համար, քան նույնիսկ պատերազմը»: Այս խոսքերը Գարեգին Նժդեհինն են ու դժվար թե հասանելի լինեն Ալիեւին, սակայն որեւէ կերպ, ցանկալի է` համանախագահների մակարդակով, գոնե մեկ անգամ պետք է հասցվի ադրբեջանական առաջնորդի սուլթան դարձած որդուն, որ սադրանքները երբեք էլ արդյունք չեն տալու:
