Ճամբարակում կայացել է վերանորոգված Բորյան եղբայրների անվան թանգարանի եւ մշակութային կենտրոնի բացումը, որին ներկա էին «Քրոնիմետ» բարեգործական հիմնադրամի եւ Վորլդ Վիժն Հայաստանի ներկայացուցիչները, Ճամբարակի քաղաքապետը եւ բնակիչները:
Հիմնադրամի մամուլի ծառայության հաղորդմամբ, «Ճամբարակի թանգարան եւ մշակութային կենտրոն» ծրագիրը մեկնարկել է 2013 մայիսի 15-ինՙ «Քրոնիմետ» բարեգործական հիմնադրամի եւ Վորլդ Վիժն Հայաստանի միջեւ համագործակցության շրջանակում: Այն նպատակ ունի վերականգնել Ճամբարակի թանգարանը եւ գրադարանըՙ վերածելով այն համայնքային եւ մշակութային կենտրոնի, ինչպես նաեւ հիմնել արհեստների եւ արվեստների խմբակներ (գորգագործության եւ փայտամշակման) երեխաների եւ դեռահասների համար:
Ճամբարակ քաղաքի մշակութային կենտրոնը եւ Բորյան եղբայրների անվան թանգարանը, որը կառուցվել է 70-ականներին, վաղուց գտնվում էին խարխլված վիճակում: Թանգարանի վերականգնումը կօգնի պահպանել մշակութային ժառանգությունը եւ համայնքի երեխաների համար կրթության եւ ժամանցի հնարավորություն կստեղծի: Ճամբարակի եւ հարակից գյուղերի 1500 երեխաների համար այն նաեւ հնարավորություն կընձեռի անհրաժեշտ հմտություններ ձեռք բերելՙ հետագայում աշխատանք գտնելու համար:
Նախագծի ընդհանուր բյուջեն կազմել է 22,287,600 դրամ, որից 12,300,000 դրամը տրամադրել է «Քրոնիմետ» բարեգործական հիմնադրամը, իսկ 9,987,600 դրամըՙ Վորլդ Վիժն Հայաստանը:
«Քրոնիմետ» բարեգործական հիմնադրամը ստեղծվել է 2011թ.-ի հունիսին, որի հիմնադիրն է «Քրոնիմետ Մայնինգ» ԲԸ գերմանական ընկերությունը:
