«ԳԱԶՊՐՈՄՆ» ՈՒԶՈՒՄ Է ՈՒԿՐԱԻՆԱՅԻՆ ԳԱԶ ՎԱՃԱՌԵԼ ԿԱՆԽԱՎՃԱՐՈՎ
Ռուսական «Գազպրոմ» ընկերության ղեկավար Ալեքսեյ Միլլերը առաջարկել է փոփոխել Ուկրաինային գազ վաճառելու կարգը եւ այսուհետեւ վաճառքն իրականացնել կանխավճարով: Պատճառն այն է, որ ուկրաինական կողմը խախտում է վճարումների պայմանները, նշում է BBC News հեռուստաալիքը:
Հաղորդվում է, որ Ռուսաստանի վարչապետ Դմիտրի Մեդվեդեւը հավանություն է տվել Միլլերի այդ առաջարկությանը:
Ավելի վաղ «Գազպրոմի» ղեկավարը հայտարարել էր, որ Ուկրաինան չի վճարել օգոստոսին մատակարարած գազի դիմաց եւ ռուսական ընկերությանը պարտք է մնացել 882 մլն դոլար:
«Ամենամոտ ժամանակներս պետք է սպասել մեր ուկրաինացի գործընկերների արձագանքին եւ ըստ այդմ ընտրել համապատասխան վարքագիծ: Եթե արձագանք չլինի, նշանակում է հարկ կլինի անցնել կանխավճարային կարգի», ասել է ՌԴ վարչապետը:
Ալեքսեյ Միլլերը իր հերթին ասել է, որ Կիեւին տարկետում էր տրվել մինչեւ հոկտեմբերի 1-ը, բայց այդ ժամկետը եւս անցել է:
