Խմբագրությանը հասցեագրված մամլո հաղորդագրությամբ Կատյա Մինաս Փելթեկյանը տեղեկացնում է, որ լույս է ընծայել Հայոց ցեղասպանության վերաբերյալ անգլիական մամուլի հրապարակումների մասին երկու գիրքՙ «Հայոց ցեղասպանության ժամանակաշրջանը: Հաղորդագրություններ բրիտանական մամուլում: 1914-1923 թթ.» ընդհանուր խորագրով: Առաջինը (450 էջ) ընդգրկում է 1914-1919 ժամանակահատվածը, իսկ երկրորդը (526 էջ), 1920-1923 շրջանը (The Times of the Armenian Genocide: Reports in the British Press (1914-1923):
Երկու գրքերում հավաքված են ավելի քան հազար հոդվածներ, խմբագրականներ, թղթակցություններ, նամակներ, ինչպես նաեւ խորհրդարանական լսումների հաղորդագրություններ, որոնց միջոցով ընթերցողը տեղեկանում է Թուրքիայում եւ Կիլիկիայում իրականացվող ցեղասպանության մանրամասնություններին: Նաեւ Սեւրի եւ Լոզանի պամանագրերին եւ թե ինչպես հայկական հարցը ի վերջո մոռացության մատնվեց շահադիտական նպատակներով:
Կատյա Մինաս Փելթեկյանը անհատ գիտաշխատող է: Ավարտել է Բեյրութի Ամերիկյան համալսարանը (ԲԱՀ) եւ Կանադայի Դելհաուզի համալսարանը: Անգլերեն է դասավանդել ԲԱՀ-ում (1988-2005 թվերին) եւ Հայկազյան համալսարանում (2005-2012 թվերին): Արաբական մամուլից Հայաստանին եւ հայերին վերաբերյալ հոդվածներ է թարգմանում անգելերեն եւ հրատարակում:
2000 թվականին հրապարակ է հանել իր առաջին գիրքըՙ «Հայոց ցեղասպանության ազդարարումը: Հաղորդագրություններ Հալիֆաքս Հերալդ պարբերականից, 1894-1922 թթ.» (Heralding of the Armenian Genocide: Reports in The Halifax Herald (1894-1922)) խորագրով, որտեղ հավաքված են կանադական այդ թերթում հրապարակված հոդվածները հայերի կոտորածների մասին: Գիրքը ժամանակին ձրի բաժանվել է Կանադայի խորհրդարանականներին, հանրային գրադարաններին, աշխարհի տարբեր համալսարանների գրադարաններին եւ գիտահետազոտական կենտրոններին: Ներկայումս աշխատում է 1875-1913 թվերի բրիտանական մամուլում լույս տեսած հոդվածների հավաքագրման աշխատանքների վրա:
