Ադրբեջանի պաշտպանության նախարարի հրամանով գեներալ Վասյակը կրկին ծառայության է կոչվել եւ նշանակվել ՊՆ ներքին անվտանգության վարչության բաժիններից մեկի պետ:
Անատոլի Վասյակը գեներալ-մայորի զինվորական կոչման արժանացել է դեռեւս խորհրդային տարիներին եւ մեկն է նրանցից, որ Ադրբեջանի անկախացումից հետո նախընտրել է մնալ այդ երկրում: Գեներալ Վասյակը պաշտոնազրկվել էր Սաֆար Աբիեւի կողմից, բայց հայրենիք չէր վերադարձել: Մինչեւ վերջերս նա համարվում էր ռազմական փորձագետ եւ հայտնի էր «կայծակնային պատերազմի տեսությամբ»:
Որքանո՞վ է Վասյակի վերանշանակումն արդարացված զուտ ռազմական առումով, թողնենք բնագավառի իրազեկ փորձագետներին: Մեզ ավելի շատ հետաքրքրական է թվում երեւույթի քաղաքական կողմը: Վասյակին պաշտոնի կոչելու առթիվ տեղեկատվության առթիվ ադրբեջանցի անանուն փորձագետը կարծիք է հայտնել, թե նա «համարվում է գլխավոր շտաբի պետ Նաջմեդդին Սադիխովի մերձավոր ընկերը»:
Ավելի վաղ ադրբեջանական աղբյուրները կարծիք էին հայտնում, որ Նաջմեդդին Սադիխովը եւ Սաֆար Աբիեւը «հավասարակշռում են Ադրբեջանի բանակաշինության երկու` ռուսաստանյան եւ արեւմտյան ուղղությունները»: Ադրբեջանի պաշտպանության նորանշանակ նախարարն, ինչպես Բաքվի լրատվամիջոցներն են բնութագրել, «սկսել է մաքրել սաֆարաբիեւյան ախոռները»:
Պաշտպանության նախկին նախարարի մերձավոր շրջապատից այլեւս գրեթե ոչ ոք չի մնացել իր պաշտոնին: Կարծիքներ կան, որ «կադրային փոփոխությունների երկրորդ փուլում կպաշտոնազրկվեն բանակային կորպուսների մի քանի հրամանատարներ»: Այդ թվում առաջինը մատնանշվում է այսպես կոչված «կենտրոնական ուղղության» կամ Բարդայի բանակային կորպուսի հրամանատարի անունը:
Սրանք զուտ փոփոխություննե՞ր են, թե՞ ադրբեջանական բանակում տեղի է ունենում «երկու ուղղությունների հավասարակշռության» վերանայում` ահա թերեւս գլխավոր հարցը: Այս իմաստով գեներալ Վասյակի վերանշանակումը կարող է խորհրդանշական լինել: Նախկին խորհրդային գեներալի անելիքը ո՞րն է լինելու Ադրբեջանի պաշտպանական գերատեսչությունում:
Այս իմաստով բավական հետաքրքրական է թվում ամերիկացի փորձագետ Մերիի կարծիքը, համաձայն որի «Ադրբեջանի եւ ամբողջ Հարավային Կովկասի նշանակությունն ԱՄՆ համար նվազում է»: Փորձագետը դա կապել է Աֆղանստանից ամերիկյան զորքերի հեռանալու եւ Իրան- ԱՄՆ հարաբերություններում լարվածության թուլացման հետ:
Փորձագետը խիստ քննադատության է ենթարկել Ադրբեջանին, որի իշխող վարչախումբը «չի ցանկանում հասկանալ, որ ամերիկյան եւ եվրոպական արտաքին քաղաքականության համար ժողովրդավարությունը եւ օրենքի գերակայությունը հիմնարար են, դրանք անհնար է շրջանցել»: Խոսքը Ադրբեջանի նախագահական «ընտրություններին» ԱՄՆ պետական դեպարտամենտի տված գնահատականի առթիվ պաշտոնական Բաքվի վերաբերմունքի մասին է:
ԱՄՆ արտաքին քաղաքականության հարցերով խորհրդի անդամ Մերիի կարծիքովՙ Ադրբեջանում «ավարտվում են նավթից եկամուտների հաշվին բարգավաճման հեշտ տարիները, գալիս են ավելի բարդ տնտեսական մարտահրավերների տարիներ»: Փաստացի ամերիկյան փորձագետն ասում է, որ Ադրբեջանն այլեւս այն հետաքրքրությունը չի ներկայացնում, ինչը թվում է Բաքվում իշխող վարչախմբին:
Բայց Իլհամ Ալիեւի կողմից վերջին օրերին ձեռնարկված քայլերն էլ վկայում են, որ Բաքվում դա հասկացել են: Այն, ինչի վրա փորձ էր արվում կառուցելու արտաքին քաղաքականությունը, գոնե այս պահին այլեւս իրատեսական չի թվում: Իսկ որ Ադրբեջանում կանխածրագրվել էր Իրանի դեմ ԱՄՆ-ի եւ Իսրայելի ռազմական գործողությունների դեպքում առավելագույն օգուտը քաղել, ներառյալ` ԼՂՀ դեմ նոր պատերազմի սանձազերծումը, թվում էՙ կասկածից դուրս է:
Հետեւաբար, ընտրվում է նո՞ր ուղղություն: Եվ նախկին խորհրդային գեներալ Վասյակի վերանշանակումը չի՞ ակնարկում, որ Բաքուն հայացքը թեքում է դեպի հյուսիս:
