Էկոնոմիկայի նախարարությունում երեկ տեղի ունեցավ ֆրանսահայ գործարարների եւ ներդնողների համաժողովը, որին մասնակցում էին 40 ֆրանսահայ եւ 50 հայաստանյան գործարարներ: Այն կազմակերպել էին սփյուռքի եւ էկոնոմիկայի նախարարությունները, Երեւանի քաղաքապետարանը, ֆրանս-հայկական առեւտրաարդյունաբերական պալատը (CCIFA) եւ Հայաստանի տնտեսական զարգացման ֆորումը (FEDA):
Սփյուռքի նախարար Հրանուշ Հակոբյանը նշեց, որ Հայաստանը հնարավորությունների երկիր է, եւ ֆրանսիական կապիտալի ակտիվացումը Հայաստանում լայն հեռանկարներ ունի: Մարսելի քաղաքապետ Ժան Կլոդ Գոդենը փաստեց, որ Երեւանի եւ Մարսելի համագործակցությունը նշանակալի արդյունքների է հասել, եւ ֆրանսահայ գործարարների ու ներդնողների ներկայությունը համաժողովին նման համագործակցության բարձր մակարդակի վառ վկայությունն է: Էկոնոմիկայի նախարարի տեղակալ Տիգրան Հարությունյանը կարեւորեց համաժողովի կազմակերպումը, ինչը հայ-ֆրանսիական հարաբերությունները տնտեսական դաշտում առավել խթանելու միտում ունի: Հայաստանում Ֆրանսիայի դեսպան Անրի Ռենոն տեղեկացրեց, որ Ֆրանսիան Հայաստանում արեւմտյան առաջատար ներդնողն է: Նա կոչ արեց ֆրանսիական ձեռնարկություններին ներդրումներ անել Հայաստանում, որտեղ դրա համար կան նպաստավոր պայմաններ:
