Եվրոմիությունը Ուկրաինայի նախագահ Վիկտոր Յանուկովիչից պահանջում է վերջնական որոշում ընդունել բանտարկված նախկին վարչապետ Յուլիա Տիմոշենկոյի արձակման վերաբերյալ: Սա պարտադիր նախապայման է ԵՄ-Ուկրաինա ասոցիացման համաձայնագրի ստորագրման համար:
Ուկրաինական «Պոդրոբնոստի» կայքէջը հաղորդում է, որ Լեհաստանի եւ Շվեդիայի արտգործնախարարներ Ռադոսլավ Սիկորսկին եւ Կառլ Բիլդտը հոկտեմբերի 22-ին մոտավորապես 1-ժամանոց հանդիպում են ունեցել նախագահ Վիկտոր Յանուկովիչի հետ: «Կեղծելու ժամանակն ավարտվել է: Հիմա գործելու ժամանակն է», հանդիպումից հետո հայտարարել է Սիկորսկին, որի խոսքը մեջբերում է Ռոյթեր գործակալությունը: Նախարարների խոսքերով, Տիմոշենկոյի գործը Եվրոմիության համար դարձել է «ընտրովի արդարադատության» ինչ-որ խորհրդանշան: Ուստի այդ գործը պետք է փակվի նախքան Եվրոմիության եւ նախկին խորհրդային հանրապետության համաձայնագրի ստորագրումը:
Եվրոմիությունում կարծում են, որ Յանուկովիչը նախկին վարչապետի դեմ գործ է բացել նախ եւ առաջ քաղաքական պատճառներով, ուստի հաստատակամորեն պահանջում են հարցի շուտափույթ լուծում: ԵՄ նախարարները հաջորդ անգամ Կիեւի հետ իրավիճակը կքննարկեն նոյեմբերի 18-ին, իսկ նոյեմբերի 28-29 Վիլնյուսում տեղի կունենա «Արեւելյան գործընկերության» գագաթաժողով, որտեղ պետք է ստորագրվի համաձայնագիրը:
«Պոդրոբնոստին» տեղեկացնում է, որ Եվրոխորհրդարանում Ուկրաինայի արդարադատության վերահսկման խմբի ղեկավարներ Պետ Կոքսը եւ Ալեքսանդր Կվասնեւսկին խարկովյան հիվանդանոցում հանդիպում են ունեցել Տիմոշենկոյի հետ: Եվրոպատգամավորները մոտ 2 ժամ զրուցել են ուկրաինական ընդդիմության առաջնորդի հետ, սակայն հրաժարվել են մեկնաբանություններ անել լրատվամիջոցներ համար:
ԻՏԱՌ-ՏԱՍՍ-ը հաղորդում է, որ Կիեւում խորհրդարանի պատգամավորները սկսել են քննարկել մի նոր օրինագիծ, որի ընդունումը Տիմոշենկոյին հնարավորություն կտար արտերկիր մեկնել բուժվելու: Անկախ պատգամավոր Անժելիկա Լաբունսկակայի ներկայացրած օրինագիծը ենթադրում է փոփոխություններ Ուկրաինայի քրեական օրենսգրքի 84-րդ հոդվածումն, որը վերաբերում է ազատազրկված անձանց արտերկրում բուժվելու հնարավորությանը: Օրենսգիրքը դատապարտյալներին դատարանի վճռով արտերկիր բուժման ուղարկելու հնարավորություն նախատեսում է լոկ այն դեպքում, եթե նրանց մեկ տարի բուժվել են ուկրաինական կլինիկաներում եւ դրական արդյունք չեն ստացել:
