Լեհաստանի Վրոցլավ քաղաքում մեկնարկել է ծանրամարտի աշխարհի հերթական առաջնությունը, որում Հայաստանը ներկայացված է ընդամենը 3 ծանրորդով: Մեր ծանրորդներից առաջինը մրցահարթակ դուրս եկավ մինչեւ 56 կգ քաշային Սմբատ Մարգարյանը: Նա մասնակցեց B խմբի մրցաշարին եւ նույնիսկ այնտեղ չկարողացավ լավագույն արդյունքը ցույց տալ:
Պոկում վարժությունը նա սկսեց 100 կգ-ից, ապա հաջորդաբար բարձրացրեց 104 եւ 107 կգ-անոց ծանրաձողերը: Իսկ ահա հրում վարժությունում Սմբատն անհաջող հանդես եկավ: Հաջողությամբ հաղթահարելով նախնական 132 կգ ծանրությունը, հայ ծանրորդը չկարողացավ մյուս 2 փորձերի ժամանակ իրեն ենթարկել 140 կգ-անոց ծանրաձողը: Երկամարտի 239 կգ (107+132) արդյունքով Սմբատը B խմբում գրավեց ընդամենը 3-րդ տեղը: Իսկ երբ պայքարի մեջ մտան ուժեղագույնները, պարզվեց, որ Սմբատ Մարգարյանի արդյունքը 11-րդն է 18 մասնակիցների մեջ:
Աշխարհի չեմպիոն հռչակվեց կորեացի Օմ Յուն Չոլը, որը երկամարտում ցույց տվեց 289 կգ (127+162) արդյունք: 2-րդ մրցանակակիր դարձավ չինացի Քսինգուան Լոնգըՙ 287 կգ (130+157): Բրոնզե մեդալը նվաճեց վիետնամցի Կիմ Թուան Թաչըՙ 283 կգ (126+157):
Աշխարհի 80-րդ առաջնությունում խաղարկված առաջին ոսկե մեդալը նվաճեց մինչեւ 48 կգ քաշային կանանց մրցավեճի հաղթող, չինացի մարզուհի Յայուն Տանը, որը երկամարտում ցույց տվեց 199 կգ (84+115) արդյունք: 2-րդ տեղը գրավեց կորեացի Հվա Չուն Ռյանգըՙ 186 կգ (81+105): 3-րդ մրցանակակիրը մեքսիկացի Կարոլինա Վալենսիա Հեռնանդեսն էրՙ 181 կգ (78+103):
Մինչեւ 53 կգ քաշային կանանց մրցավեճում լավագույնը չինացի Յայուն Լին էրՙ 221 կգ (100+121): Նա անձնական ավելի թեթեւ քաշի շնորհիվ առաջ անցավ 2-րդ տեղը գրաված Քրիստինա Իովուից, որը ներկայացնում էր Ադրբեջանը եւ նույնպիսի արդյունք էր ցույց տվել: Բրոնզե մեդալը բաժին հասավ թայլանդցի Սոպիտա Տանասանինՙ 203 կգ (91+112):
