Հարցազրույցըՙ ԱՐԱ ՄԱՐՏԻՐՈՍՅԱՆԻ
Ըստ Հայ ոսկերիչների ասոցիացիայի փոխնախագահիՙ 100-ից ավելի մասնակիցներ են լինելու 20 երկրներից
Հոկտեմբերի 28-30-ը Երեւանի Կ. Դեմիրճյանի անվան մարզահամերգային համալիրում տեղի կունենա ոսկերչական խոշոր ցուցահանդես, որտեղ կցուցադրվեն աշխարհի բազմաթիվ երկրներում գործող հայ ոսկերիչների աշխատանքները: Ցուցահանդեսի կազմակերպիչն է ավելի քան 10 հազար հայ ոսկերիչների միավորող Հայ ոսկերիչների ասոցիացիան, որի փոխնախագահ եւ Համաշխարհային ոսկերչության կոնֆեդերացիայի արտադրողների կոմիտեի նախագահ Արտակ Ուդումյանի հետ զրույցի ժամանակ անդրադարձանք ցուցահանդեսի նպատակներին եւ ասոցիացիայի կողմից Հայաստանում ոլորտը զարգացնելու ուղղությամբ նախատեսվող քայլերին:
– Պրն Ուդումյան, ո՞ր երկրներից եւ քանի՞ մասնակից է ունենալու նախատեսվող ոսկերչական ցուցահանդեսը:
– Այս ցուցահանդեսն արդեն ավանդական է դարձել, երրորդ անգամ է Երեւանում կազմակերպվում նման ցուցահանդես: Այս անգամ ցուցահանդեսի մասշտաբներն շատ ավելի մեծ են, մասնակիցների քանակը 100-ից ավելի է լինելու` Հայաստանից եւ մոտ 20 ուրիշ երկրներից: Համեմատության համար տեղեկացնեմ, որ նախանցյալ տարվա ցուցահանդեսին 28 մասնակից կար, անցյալ տարվա ցուցահանդեսին` 46: Այսինքն, մասնակիցների թվի աննախադեպ աճ կա, ինչը լուրջ հայտ է այս ցուցահանդեսը տարածաշրջանային դարձնելու համար, իսկ 20 երկրներից մասնակիցների առկայությունն արդեն վկայում է դրա միջազգային լինելու մասին: Մասնակցեու են ԱՄՆ-ից, Ռուսաստանից, Լիբանանից, Ֆրանսիայից, Քուվեյթից, Իսրայելից, Թաիլանդից, Կանադայից, այլ երկրներից: Այս տարի Թուրքիայից սպասում ենք հայ ոսկերիչների մեծ պատվիրակության: Այդ երկրից 25-30 մասնակից է լինելու: Մոտ 1,5 տարի առաջ Թուրքիայում ստեղծեցինք Հայ ոսկերիչների ասոցիացիայի բաժանմունքը, որի մեջ ընդգրկված են 860 հայ ոսկերիչներ: Կցանկանայի արձանագրել, որ համահայկական կառույցի մասնաճյուղ ստեղծելը Թուրքիայում իսկապես կարելի է երեւույթ համարել:
– Ի՞նչ նշանակություն կունենա այս ցուցահանդեսը Հայաստանում ոսկերչության զարգացման համար:
– Ոսկերչության զարգացման համար ցուցահանդես կազմակերպելը կարեւորագույն պայմաններից մեկն է: Դրա միջոցով արտերկրից ներգրավում ենք գործարարների, որոնք տեսնում են Հայաստանի ոսկերչությունը եւ սկսում են ընկալել Հայաստանը որպես ոսկերչության տարածաշրջանային կենտրոն: Բացի սրանից, մեր միությունն արդեն սկսել է աշխատանքները Հայաստանում ոսկերչության, ադամանդագործության եւ ժամագործության ազատ տնտեսական գոտի ստեղծելու ուղղությամբ: Այն լինելու է «Հայավիահամալիր» ձեռնարկության շենքում: Դա եւս կնպասատի Հայաստանում ոսկերչության զարգացմանը եւ այս ոլորտում մեր տարածաշրջանային կենտրոն դառնալուն: Նախատեսում ենք, որ մոտ 100 վարձակալներ կունենանք ազատ տնտեսական գոտում, որոնք կգան, ներդրումներ կկատարեն, արտադրություններ կստեղծեն, բացելով նոր աշխատատեղեր եւ բերելով նոր տեխնոլոգիաներ: Սա կնպաստի նաեւ հարակից ճյուղերի ստեղծմանը, այդ թվում տարբեր ծառայությունների զարգացմանը:
– Միայն հայազգի՞ ոսկերիչներ են ժամանելու Հայաստան:
– Ոչ իհարկե: Մենք բոլորին հայտնում ենք, որ Հայաստանի կառավարությունը ազատ տնտեսական գոտի է ստեղծել այս ոլորտը զարգացնելու համար, որ կարող են գալ, արտադրել, արտահանել իրենց արտադրանքը, որից եւ իրենք կշահեն, եւ մեր երկիրը: Ցուցահանդեսը տեղի է ունենալու մարզահամերգային համալիրի երկու` կոնֆերանսների եւ Արգիշտի դահլիճներում: Ներկայացվելու են հայ ոսկերիչների հանրահայտ միջազգային բրենդներ: Ակնկալում ենք, որ Հայաստանի նախագահը կկատարի բացումը: Հոկտեմբերի 30-ին տեղի է ունենալու Հայաստանում ոսկերգործության զարգացման խնդիրներին նվիրված կոնֆերանս, որին հրավիրված են եւ մասնակցելու են նաեւ Համաշխարհային ոսկերչության կոնֆեդերացիայի նախագահ Գաետանո Կավալերին, «Վիչենցա» համաշխարհային ցուցահանդեսների կազմակերպության ներկայացուցիչը, որի հետ ցուցահանդեսների կազմակերպման հարցում համագործակցության պայմանագիր ենք կնքել: Մի խոսքով, համեցեք ցուցահանդեսին, մուտքն ազատ է լինելու:
