Ըստ Նիկոլայ Բորդյուժայիՙ Ռուսաստանը հենց այդ նպատակով է զենք վաճառել Ադրբեջանին
«Ի հակադրություն մեր իսկ ընդունած որոշումների, որոշ անդամ պետություններ այլ հարթակներում եւ ուրիշ կազմակերպություններում նույն հարցի կապակցությամբ ընդունում են հայտարարություններ, որոնք աններդաշնակ են ՀԱՊԿ շրջանակներում ընդունված որոշումներին: Վերջին տարիներին փաստաթղթեր են ընդունվել, այդ թվումՙ նախագահական մակարդակով, որոնցում ադրբեջանական կողմի մատուցմամբ ընտրողաբար, ի վնաս մյուս սկզբունքների, առանձնանում է տարածքային ամբողջականության սկզբունքը»:
Սա հատված էր նախագահ Սերժ Սարգսյանիՙ Սոչիում կայացած Հավաքական անվտանգության խորհրդի նստաշրջանի ելույթից:
Նախագահի խոսքերը որպես բարեկամական քննադատություն է ներկայացնում ՀԱՊԿ-ի գլխավոր քարտուղար Նիկոլայ Բորդյուժան, հավելելով, որ Սարգսյանի կողմից կտրուկ քննադատություն չի եղել:
«Իհարկե, Սերժ Սարգսյանը բարձրացրել է ՀԱՊԿ-ի որոշ անդամների կողմից ոչ բարեկամական փաստաղթղերի ընդունմանը մասնակցելու հարցը, սակայն դա բարեկամական քննադատություն էր: Նման հարցերը քննարկվում են կառույցի շրջանակներում: Նմանատիպ հարցեր բարձրացնում են կառույցի բոլոր անդամ երկրների նախագահները», ասաց Բորդյուժան: Նրա խոսքերովՙ ՀԱՊԿ-ը երբեք չի ունեցել առաջադրանքՙ խաղաղապահներ տեղադրել ղարաբաղյան հակամարտության շփման գծում:
«Մենք մեր առջեւ երբեք նման առաջադրանք չենք դրել, որ ՀԱՊԿ-ի խաղաղապահները այս կամ այն թեժ կետում կամ սառեցված հակամարտության գոտում ներկայացված լինեն: Դրա պատճառն այն է, որ ՀԱՊԿ-ի խաղաղապահ ուժերը ձեւավորվել են մի քանի տարի առաջ եւ այժմ համատեղ զորավարժության պատրաստությունների փուլն են անցնում»:
Անդրադառնալով մի քանի ամիս առաջ Ռուսաստանի կողմից Ադրբեջանին զենքի վաճառքին, Բորդյուժան ասաց, որ այդ կերպ Ռուսաստանը ցանկացել է պահպանել ուժերի հավասարակշռությունը տարածաշրջանում:
«Ինձ շատ հաճախ են հարցնում հատկապես Ադրբեջանի կողմից վերջին զենքի գնման կապակցությամբ, եւ ես ասել եւ էլի կրկնում եմ, որ որոշում ընդունելով զենք վաճառել մի երկրի, հատկապես որ նա գտնվում է Հայաստանի անմիջական հարեւանությամբ, մենք հաշվի ենք առել ռազմական հավասարակշռության ապահովումը տարածաշրջանում», ասաց Բորդյուժան:
Հարցինՙ Վիլնյուսում հնարավոր ստորագրվելիք փաստաթուղթն ինչպես կազդի ՀԱՊԿ-Հայաստան հարաբերությունների վրա, Բորդյուժան նշեց, որ հարցի պատասխանը տրվել է Մաքսային միությանը միանալու վերաբերյալ սեպտեմբերյան հայտարարությամբ:
