Երեկ Բաքվի առանձնապես ծանր հանցագործությունների գործերով դատարանն սկսել է Միլլի մեջլիսի նախկին պատգամավոր եւ իշխող կուսակցության անդամ Գյուլար Ահմեդովայի դատավարությունը: Նա մեղադրվում է խարդախությամբ ուրիշի առանձնապես խոշոր չափի ունեցվածքին տիրանալու մեջ:
Գյուլար Ահմեդովան կառավարող կուսակցությունից հեռացվեց, պատգամավորությունից «հրաժարվեց» եւ ձերբակալվեց այն բանից հետո, երբ Ադրբեջանի միջազգային համալսարանի նախկին ռեկտորը, գտնվելով վտարանդիության մեջ, համացանցում տեսանյութ տարածեց, որտեղ Գյուլար Ահմեդովան Իլհամ Ալիեւի աշխատակազմի ղեկավար Ռամիզ Մեհթիեւի անունից խոստանում է 500 000 դոլարի դիմաց նրան «դարձնել պատգամավոր»:
Բաքվում իշխող վարչախումբն ամեն ինչ արել էր, որպեսզի Ահմեդովայի դատավարությունը հաջորդի նախագահական «ընտրություններին»: Ամենայն հավանականությամբ, Իլհամ Ալիեւը երկյուղ ուներ, որ Ահմեդովան դատարանում կասի ոչ ցանկալի բաներ, եւ ընդդիմությունը դա կօգտագործի որպես հակաքարոզչության նյութ: Բացառված չէ, որ ադրբեջանական ռեժիմը հույս ուներ Ահմեդովայից Իլհամ Ալիեւի թեկնածությունն «անվերապահորեն պաշտպանելու» խոստովանագիր, ինչպես դա եղավ այլ ձերբակալվածների եւ դատապարտյալների դեպքում, սակայն նախկին պատգամավորը մնացել էր անդրդվելի:
Երեկ, սակայն, Ահմեդովան դատարանում անսպասելի հայտարարություն է արել` պահանջելով, որ գործին իբրեւ վկա ներգրավվեն ընդդիմությունից նախագահի թեկնածու Ջամիլ Հասանլին եւ Բաքվում ԱՄՆ դեսպան Ռիչարդ Մորնինգսթարը: Մեղադրյալը պնդել է, որ Հասանլին եւ Մորնինգսթարը «խախտել են անմեղության կանխավարկածը` իրեն անվանելով պատգամավորական մանդատների առուվաճառքով զբաղվող»:
Կասկած չի հարուցում, որ Ահմեդովայի հայտարարությունը նախապես մշակվել է Իլհամ Ալիեւի աշխատակազմում, որտեղ Ադրբեջանի նախագահական «ընտրությունների» վերաբերյալ ԱՄՆ պետդեպարտամենտի կոշտ հայտարարությունից հետո տենդագին փնտրտուքների մեջ են, թե ինչպես կարելի է «քացախ մատուցել» Վաշինգտոնին:
Իրավիճակը խճճվել է հատկապես այն բանից հետո, երբ Իլհամ Ալիեւի` անցյալ կիրակի տեղի ունեցած, «երդմնակալության» արարողությանը Բաքվում Միացյալ Նահանգների դեսպանը չի հրավիրվել: Վերջինս երեկ հակադարձել է կարճ հայտարարությամբ, ըստ որի ԱՄՆ-ը «պատրաստ է աշխատել Իլհամ Ալիեւի կառավարության եւ, միաժամանակ, Ադրբեջանի քաղաքացիական հասարակության հետ` առաջ մղելու ժողովրդավարությունը»:
Սպիտակ տունն, այսպիսով, Բաքվի «դեմարշին» պատասխանել է բազմանշանակ ակնարկով, որ ԱՄՆ-ը չի հրաժարվում Ադրբեջանում ժողովրդավարությանն աջակցելու նպատակադրվածությունից: Եվ գրեթե միաժամանակ մեղադրյալ Գյուլար Ահմեդովան բարձրացրել է իր գործով որպես վկայի Բաքվում ԱՄՆ դեսպանին դատակոչելու «անհրաժեշտության» խնդիրը:
Դեսպան Մորնինգսթարը երեկ չի անդրադարձել իր հասցեին մեղադրյալ Գյուլար Ահմեդովայի ասածներին: Խնդիրը մեկնաբանել է նախագահի ընդդիմադիր թեկնածու Ջամիլ Հասանլին: Վերջինիս գնահատմամբ, «պատվի եւ արժանապատվության կամ անմեղության կանխավարկածից խոսելուց առաջ Գյուլար Ահմեդովան հնարավորություն ունի դատարանում ապացուցելու իր անմեղությունը»: Հասանլին ասել է նաեւ, որ «չի պատրաստվում ներկայանալ դատարան, քանի որ տարածվել է տեսանյութ, որն ապացուցում է Ահմեդովայի մեղավորությունը»:
Այդուհանդերձ, չափազանց հետաքրքրական կլիներ Բաքվում իրենց դեսպանին որպես վկայի «դատակոչելու» գաղափարի վերաբերյալ Միացյալ Նահանգների պաշտոնական վերաբերմունքը: Մենք այնքան միամիտ չենք, որ ակնկալենք, թե ԱՄՆ պետական դեպարտամենտը հանդես է գալու հայտարարությամբ: Միաժամանակ, սակայն, դեսպան Մորնինգսթարին «դատակոչելու» մասին մեղադրյալ Գյուլար Ահմեդովայի հայտարարությունը Վաշինգտոնում հազիվ թե աննկատ մնա:
Մեղադրյալի նախկին կարգավիճակը եւ գործի լրջությունն, ամենայն հավանականությամբ, Օբամայի կառավարությանը կստիպեն առնվազն «փակ խողովակներով» պաշտպանել դեսպան Մորնինգսթարի ռենոմեն, որ նույնն է, թե ամեն ինչ կարվի, որպեսզի Ադրբեջանում պաշտպանվի ԱՄՆ պետական հեղինակությունը:
Այլապես ի՞նչ երաշխիք, որ վաղը «դատակոչի հրավեր» չի ստանա նաեւ ԱՄՆ պետքարտուղարը…
