ԲԵՌՆԱՐ ՖԱՍԻԵՆ ԿԱՐԵՎՈՐԵԼ Է ԱՐՑԱԽԻ ՄԱՍՆԱԿՑՈՒԹՅՈՒՆԸ ԲԱՆԱԿՑԱՅԻՆ ԳՈՐԾԸՆԹԱՑԻՆ

Հ. Հ.

Հոկտեմբերի 14-15-ին Բրյուսելում կայացել է Եվրոպահայերի երրորդ համագումարըՙ մասնակցությամբ 20 երկրի 170 պատվիրակների: ՀՅԴ Հայ դատի եւ քաղաքական հարցերի գրասենյակի ղեկավար Կիրո Մանոյանի խոսքերովՙ համագումարում քննարկվել են Հայաստանում առկա օրակարգային հարցերՙ ԼՂ հիմնախնդիր, ջավախահայության իրավունքներ, Ցեղասպանության 100-րդ տարելիցին ընդառաջ նոր մարտավարության մշակում եւ այլն: Համագումարին մասնակցել են ԼՂՀ նախագահ Բակո Սահակյանը, ՀՀ ԱԺ նախագահ Հովիկ Աբրահամյանը, Մեծի տան Կիլիկիո կաթողիկոս Արամ Առաջինը: «Խոսվեց Հայոց ցեղասպանության ու նաեւ այն մասին, որ ժամանակն է անցնելու հատուցման խնդիրներին: Տեսակետ հնչեց եվրոպական միջավայրի համար առիթ ստեղծելու հայ մտավորականներին համախմբելու համար: Շատ կարեւոր էր Եվրոպայում հայ համայնքների իրավիճակը», ասաց Մանոյանըՙ հավելելով, որ համագումարի քննարկման գլխավոր առարկան Եվրոպայում թուրք-ադրբեջանական լոբբիստական կազմակերպություններին դիմակայելն էր: Համագումարում ԵԱՀԿ ՄԽ ֆրանսիացի նախկին համանախագահ Բեռնար Ֆասիեն անհրաժեշտ է համարել, որ Արցախը մասնակցի բանակցային գործընթային: «Ֆասիեն կոչ արեց Ռուսաստանին, որ չկիրառի «բաժանիր, որ տիրես» քաղաքականությունը: Միաժամանակ կոչ է արել ԱՄՆ-ինՙ Արցախի հարցով միջնորդության ժամանակ հաշվի չառնել Թուրքիայի հետ իր ռազմավարական դաշնակից լինելու փաստը»: