Բուլղարիայի եւ Իտալիայի հավաքականների հետ անցկացրած հաջող ելույթների շնորհիվ ֆուտբոլի Հայաստանի ազգային հավաքականը ՖԻՖԱ-ի դասակարգման ցուցակում հայտնվել է իր պատմության մեջ ամենաբարձրՙ 38-րդ հորիզոնականում: Նախորդ ամսվա համեմատ մեր հավաքականի վարկանիշը բարձրացել է 95-ով, իսկ Հայաստանի ընտրանին առաջադիմել է 17 տեղով:
ՖԻՖԱ-ի դասակարգման ցուցակում մինչ օրս Հայաստանի հավաքականի լավագույն արդյունքը 2012-ի փետրվարի ցանկում 41-րդ հորիզոնականն էր: Նշենք, որ ՖԻՖԱ-ի վարկանիշային աղյուսակը կազմելիս հաշվի են առնվում վերջին 4 տարիների արդյունքները: Հայաստանը ներկայումս 687 միավոր ունի, որից 446-ը վաստակել է այս տարի:
Հարկ է նշել, որ ՖԻՖԱ-ի դասակարգման հենց այս ցուցակում զբաղեցրած տեղերի հիման վրա էլ զամբյուղներում տեղաբաշխվելու են աշխարհի առաջնության մասնակիցները եզրափակիչ փուլի վիճակահանության ժամանակ: Ինչպես հայտնի է, մասնակից 32 երկրների հավաքականները նախնական փուլում բաժանվելու են 8 խմբի: Անկախ դասակարգման ցուցակում տեղ գրաված դիրքից, Բրազիլիայի հավաքականը, որպես առաջնության կազմակերպիչ երկիր, գլխավորելու է խմբերից մեկը, ուստի ընդգրկվելու է 1-ին զամբյուղում: Մնացած 7 խմբերը կգլխավորեն դասակարգման ցուցակում 1-7-րդ տեղերում գտնվող հավաքականներըՙ Իսպանիան, Գերմանիան, Արգենտինան, Կոլումբիան, Բելգիան, Ուրուգվայը (եթե հաջողության հասնի անցումային խաղերում) եւ Շվեյցարիան:
Նախկին ԽՍՀՄ հանրապետությունների հավաքականներից լավագույն արդյունքն ունի Ռուսաստանը, որը 19-րդ տեղում է: Ռուսները 4 հորիզոնականով նահանջել են: 20-րդ տեղում Ուկրաինան է, որը 6 տեղով առաջադիմել է: Հայաստանի հավաքականի արդյունքը 3-րդն է: Մյուս հանրապետությունների ցուցանիշներն այսպիսին են. 55. Ուզբեկստան, 83. Բելառուս, 88. Ադրբեջան, 96. Մոլդովա, 99. Էստոնիա, 100. Վրաստան, 103. Լիտվա, 116. Տաջիկստան, 117. Լատվիա. 125. Թուրքմենստան, 135. Ղազախստան, 150. Ղրղզստան:
Նախորդ ամսվա համեմատ ամենամեծ առաջընթացն ունեցել է Մոլդովայի հավաքականը, որը 33 տեղով բարձրացել է ու հանգրվանել է 96-րդ հորիզոնականում: Շոտլանդիայի ընտրանին 28 տեղով է առաջադիմելՙ զբաղեցնելով 35-րդ հորիզոնականը:
ՀՀ հավաքականը ՖԻՖԱ-ի դասակարգման ցուցակում գտնվում է Վենեսուելայի եւ Պերուի հավաքականների հարեւանությամբ: Մեր ընտրանին ամենավատ ցուցանիշն ունեցել է 1994-ի հուլիս-օգոստոսինՙ զբաղեցնելով 159-րդ հորիզոնականը: Այս տարվա հունվարին Հայաստանի հավաքականը 457 վարկանիշով 75-րդ տեղում էր: Այս տարվա ամենացածր ցուցանիշը գրանցվել է ապրիլ-մայիսինՙ 90-րդ տեղ:
