ՀԱՍՄԻԿ ԲԱԼԵՅԱՆ
Բոլորին հայտնի է, որ մեղրը բնության «ամենակարող» բժիշկներից է. բուժում եւ կանխում է բազմաթիվ հիվանդություններ: Մեղրը կարգավորում է արյան ճնշումը, բուժում երիկամային եւ մաշկային որոշ հիվանդություններ, կանխում երեխաների գիշերամիզությունը: Բազմաթիվ օգտակար հատկություններ ունի նաեւ մեղրամոմը. հիանալի քսուք է վերքերի բուժման համար, վերացնում է կնճիռներն ու ճաքերը:
– Մեղրը ստեղծվում է մեղուների մարսողական գործողությունից: Ծաղկի նեկտարը ենթարկվում է ֆերմենտացիայի, իսկ ավելորդ հեղուկը գոլորշանում է,- բացատրում է կենսաբանական գիտությունների թեկնածու, մեղվաբույծ Կամո Պետրոսյանը:- Մեղրը հիմնականում պատրաստվում է տարբեր ծաղիկների նեկտարից, ուստի պարունակում է բազում օգտակար նյութեր մարդու առողջության համար:
Ինչպե՞ս տարբերել մեղվի եւ «մարդու» պատրաստած մեղրը: Մեղվաբույծ Կամո Պետրոսյանը բացում է մասնագիտական մի քանի գաղտնիք.
– Անարատ մեղրը մի ամանից մյուսը դատարկելու ընթացքում չպետք է կտրվի, այլ ծորալով դանդաղ իջնի ու ծալքերով կուտակվի: Եթե անարատ մեղրը թղթի վրա քսենք ու փորձենք այրել, չի այրվի, իսկ կեղծ մեղրն այրվում է:
Շաքարային դիաբետով տառապողներին եւս բժիշկները խորհուրդ են տալիս քաղցրի պահանջը բավարարել մեղրով: «Ամենակարող բժիշկն» այս դեպքում էլ է հասնում օգնության: Եթե մարդն ամեն օր մեղր օգտագործի, կարող է խուսափել բազում հիվանդություններից` ճնշման խանգարումներ, ստամոքսի խոց, մաշկային հիվանդություններ, տեսողական խնդիրներ:
Մեղրն իր օգտակար հատկություններով հայտնի է եղել դեռ մ.թ.ա: Հույն մաթեմատիկոս Պյութագորասն իր երկարակեցությունը եւ լավ հիշողությունը բացատրում էր, որ ինքը պարբերաբար օգտագործել է մեղր: Հին հույն բժիշկ Հիպոկրատն իր «Վերքերի մասին» աշխատության մեջ ներկայացրած շատ դեղատոմսերում ընդգրկել է նաեւ մեղրը: Դեռ մ.թ.ա. 3000 թ. Եգիպտոսում լավ զարգացած է եղել մեղվաբուծությունը: Եգիպտացիները բազմաթիվ հիվանդություններ բուժում էին մեղրով պատրաստուկներով: Եգիպտացիները պնդում եին, որ առողջ մնալու համար մարդն անպայման պետք է մեղր ուտի: Իսկ մեղրով ու կաթով լոգանքը համարվում էր ամենաբուժիչ ու հանգստացնող միջոցներից մեկը: Մեղրի ու կաթի պատրաստուկը այսօր ել կիրառվում է մաշկը հարթ եւ առողջ պահելու համար:
Այնպես որ, կերե՛ք մեղր եւ եղեք առողջ ու գեղեցիկ:
