Գերմանական KfW բանկի եւ Հայաստանի Հանրապետության Կենտրոնական բանկի միջեւ կնքված «Հայաստանի գյուղատնտեսության ոլորտի աջակցման» ծրագրի շրջանակներում 15 մլն եվրոյի համարժեք դրամի չափով վարկ տրամադրելու մասին պայմանագրով նախատեսված վարկային պարտավորությունների ապահովման նպատակով երեկ կառավարությունը որոշեց Կենտրոնական բանկին տրամադրել նույն չափով բյուջետային երաշխիք:
25 մլն եվրոՙ փոքր բիզնեսի վարկավորման համար
Ֆինանսների նախարար Դավիթ Սարգսյանը երեկ կառավարության նիստում տեղեկացրեց, որ եվրոբոնդերի վաճառքից ստացված գումարից «Հայաստանի փոքր եւ միջին ձեռնարկատիրության զարգացման ազգային կենտրոն» հիմնադրամին կհատկացվի մինչեւ 25 մլն դոլարին համարժեք դրամ բյուջետային վարկ, 6 տարի մարման ժամկետով, տարեկան 8 տոկոս տոկոսադրույքով, առանց պարտավորությունների կատարման ապահովման միջոցի: Վարչապետ Տիգրան Սարգսյանը ճշտեց, որ տոկոսադրույքը կլինի 7,5 տոկոս:
Ճարտարապետության պետական կոմիտեն սկսեց գործել
Կառավարությանն առընթեր ճարտարապետության պետական կոմիտեի կանոնադրությունն ու կառուցվածքը կառավարության հաստատմանը ներկայացնելովՙ կոմիտեի նախագահ Նարեկ Սարգսյանն ասաց, որ կառույցի ստեղծման հիմնական նպատակն է ազգային ճարտարապետության պահպանումը եւ զարգացումը, կառուցապատման ծրագրերին մասնագիտական խորհրդատվության տրամադրումը, ճարտարապետության ոլորտի կարգավորմանն ուղղված օրենսդրության կատարելագործումը, տեղական ինքնակառավարման մարմիններին ճարտարապետության ոլորտի մասնագիտական խորհրդատվության տրամադրումը:
Հարցի առնչությամբ կարծիք հայտնելովՙ արդարադատության նախարար Հրայր Թովմասյանն ասաց, որ կոմիտեի լիազորությունները պետք է սահմանել օրենքով: Վարչապետ Տիգրան Սարգսյանի հարցին, թե կառավարությանն առընթեր այլ կոմիտեների լիազորությունները նո՞ւյնպես սահմանված են օրենքով, արդարադատության նախարարը պատասխանեց, որ ոչ բոլորինը, դա համարելով սխալ: Այդ առթիվ վարչապետը հանձնարարեց Հրայր Թովմասյանինՙ հանդես գալ պետական կոմիտեների գործունեությունը կարգավորող օրենսդրական նախաձեռնությամբ: Միաժամանակ, կառավարությունը հաստատեց նորաստեղծ կոմիտեի կառուցվածքն ու կանոնադրությունը:
