Ժնեւում ավարտվել է իրանական միջուկային ծրագրին նվիրված բանակցությունների հերթական փուլը, որի մասնակիցներն էին Իրանի եւ «Վեցյակի» երկրների (ԱՄՆ, ՌԴ, Մեծ Բրիտանիա, Ֆրանսիա, Չինաստան եւ Գերմանիա) ներկայացուցիչները: Երկօրյա հանդիպման ընթացքում նախագահում էր Եվրոմիության դիվանագիտության պատասխանատու Քեթրին Էշթոնը:
Բանակցությունների ավարտից հետո ինչպես Էշթոնը, այնպես էլ Իրանի արտգործնախարար Մոհամմադ Ջավադ Զարիֆը դրանք բնութագրել են որպես «բովանդակալից եւ ապագային միտված»: Սպիտակ տան մամլո քարտուղար Ջեյ Քարնին իր հերթին հայտարարել է, որ բանակցությունները ցուցադրեցին «մինչեւ օրս չտեսնված լրջություն եւ խորություն»:
«Ազգը» գրել է, որ իրանցիները Ժնեւ էին եկել միանգամայն նոր, առայժմ չհրապարակված առաջարկություններով, որոնք հետաքրքրել են Արեւմուտքին:
«Վեցյակի» ներկայացուցիչները Ռոյթեր գործակալության թղթակցին հայտնել են, որ հանդիպման մասնակիցները պայմանավորվել են ժնեւյան բանակցությունների հաջորդ փուլն անցկացնել նոյեմբերի 7-ին եւ 8-ին:
Իրանցիների միջուկային ծրագիրն առանձնակի խստությամբ դատապարտող Իսրայելի երկու լրատվամիջոցներիՙ «Եդիոտ Ահրոնոտ» թերթի եւ «Քոլ Իսրայել» ռադիոկայանի թղթակիցներին հաջողվել է փոքրիկ հարցազրույց անցկացնել Իրանի փոխարտգործնախարար, Ժնեւում իրանական պատվիրակության ղեկավար Աբբաս Արաղչիի հետ: Վերջինս հույս է հայտնել, որ իր երկրի առաջարկությունների փաթեթը «կգոհացնի նաեւ Իսրայելին»:
