Արամ Խաչատրյան համերգասրահում այսօր, հոկտեմբերի 17, տեղի կունենա Հայաստանի պետական երիտասարդական նվագախմբի եւ դաշնակահար Ալեքսանդր Ռոմանովսկու (Ուկրաինա/Իտալիա), ջութակահար Հայկ Գազազյանի (Հայաստան/Ռուսաստան), կոնտրաբասահար Հայկ Խաչատրյանի (Շվեյցարիա/Հայաստան) համատեղ համերգը Արամ Խաչատրյանի անվան միջազգային փառատոնի շրջանակներում:
Համերգի ծրագրում կհնչեն Սերգեյ Պրոկոֆեւի Դաշնամուրի թիվ 2 կոնցերտը (մենակատար Ալեքսանդր Ռոմանովսկի), Յան Սիբելիուսի Ջութակի կոնցերտը (մենակատար Հայկ Գազազյան), Սերգեյ Կուսեվիցկու Կոնտրաբասի կոնցերտը (մենակատար Հայկ Խաչատրյան):
Ինչպես երեկ լրագրողների հետ հանդիպմանն հավաստիացրեց Սերգեյ Սմբատյանը, ընտրված է համերգային պրոֆեսիոնալ եւ բարդ ծրագիր եւ ավելացրեց. «Վաղը կայանալիք համերգին Ալեքսանդր Ռոմանովսկին Հայաստանում ելույթ է ունենալու առաջին անգամ, իսկ ջութակահար Հայկ Գազազյանը հայաստանյան հանդիսատեսին կներկայանա 17 տարվա ընդմիջումից հետո»:
Իսկ Ալեքսանդր Ռոմանովսկին նշեց, որ հաճելի եւ ոգեւորող է իր համար ելույթ ունենալ երիտասարդ երաժիշտների հետ, քանի որ երիտասարդներն ավելի արագ են արձագանքում. նրանք կարող են ընդօրինակել ե՛ւ լավը, ե՛ւ վատը, ուստի շատ կարեւոր է, թե ինչպես ես աշխատում նրանց հետ: Անդրադառնալով Պրոկոֆեւի Դաշնամուրի կոնցերտին` ասաց, որ այն իր սիրած ստեղծագործություններից է. «Պրոկոֆեւն այն գրել է 21 տարեկանում, եւ պետք է ասել, որ իսկական տաղանդն արտահայտվում է որեւէ տարիքում: Այս կոնցերտում մենք կարող ենք տեսնել հեղինակի ստեղծագործական ողջ հզորությունն ու աներեւակայելի ֆանտազիան»:
Շվեյցարաբնակ կոնտրաբասահար Հայկ Խաչատրյանն էլ Հայաստանի պետական երիտասարդական նվագախմբի հետ աշխատել է ամռանն Իտալիայում եւ հավաստիացրեց, որ Կուսեւիցկու Կոնտրաբասի կոնցերտը (որի կատարումը ի դեպ երեւանյան պրեմիերա է) լսելուց հետո հետաքրքրություն կառաջանա կոնտրաբասի նկատմամբ»:
