Ուսանողները, դասախոսները, պաշտոնական անձինք ու լրագրողներն ավելին իմացան իսպաներենիՙ որպես ՄԱԿ-ի պաշտոնական լեզուներից մեկի կարեւոր դերի մասին «ՄԱԿ-ում իսպաներենի օրվան» նվիրված միջոցառման ժամանակ:
Միջոցառման նպատակն է նպաստել մշակութային բազմազանությանն ու բազմալեզվությանը ՄԱԿ-ում: Իսպաներենը ՄԱԿ-ի վեց պաշտոնական լեզուներից մեկն է եւ խիստ կարեւոր դեր է խաղում աշխարհով մեկ ՄԱԿ-ի ուղերձը տարածելու հարցում:
Միջոցառումը կազմակերպվել էր համատեղՙ Խաչատուր Աբովյանի անվան հայկական պետական մանկավարժական համալսարանի եւ ՄԱԿ-ի հանրային տեղեկատվության վարչության (ՄԱԿ ՀՏՎ) կողմիցՙ համալսարանի եւ ՄԱԿ ՀՏՎ միջեւ Համագործակցության ծրագրի շրջանակներում: Ավելի քան երեսուն ուսանողներ երգերով եւ այլ կատարումներով մասնակցեցին իսպաներեն լեզուն ներկայացնող միջոցառմանը:
Մարիա Դոցենկոնՙ ՄԱԿ-ի հանրային տեղեկատվության վարչության գրասենյակի ներկայացուցիչը Հայաստանում, ասաց. «Կարեւոր է, որ հայերը սովորում են իսպաներեն, ինչը կօգնի նրանց բացել սահմանները եւ սովորել ավելին իրենց շրջապատող աշխարհի մասին, դառնալ աշխարհի քաղաքացիներ: Մենք ապրում ենք բազմալեզու աշխարհում, որտեղ լեզուները, որոնցով մենք խոսում, կարդում կամ գրում ենք, ազդում են մեր մտածելակերպի եւ մեր գործունեության վրա»:
Տիգրան Միքայելյանը` Հայկական պետական մանկավարժական համալսարանի օտար լեզուների ֆակուլտետի դեկանը, ասաց. «Մեր նպատակն է հայերի շրջանում էլ ավելի բարձրացնել իրազեկությունը օտար լեզուների հարստության, գեղեցկության եւ մշակութային կարեւորության մասին»:
Որոշ հաշվարկներով աշխարհում մոտ 500 միլիոն մարդ խոսում է իսպաներեն, որը համարվում է աշխարհում ամենաշատ խոսվող երրորդ լեզուն:
Արաբերենը, չինարենը, անգլերենը, ֆրանսերենը, ռուսերենը եւ իսպաներենը ՄԱԿ-ի վեց պաշտոնական լեզուներն են: 2010 թվականից սկսված Նյու Յորքում ՄԱԿ ՀՏՎ-ն հայտարարել է «ՄԱԿ-ում լեզուների օրերի» մեկնարկը: ՄԱԿ ՀՏՎ երեւանյան գրասենյակը 2013 թ. ընթացքում իր գործընկերների հետ նշում է ՄԱԿ-ում բոլոր պաշտոնական լեզուների օրերը:
