«Հայաստանի պետական ճարտարագիտական համալսարանում (Պոլիտեխնիկ) տիրում է վախի մթնոլորտը», հավաստիացնում են համալսարանի դասախոսներըՙ հավելելով, որ պրոռեկտորից մինչեւ հավաքարար վախենում են, քանի որ ռեկտոր Արա Ավետիսյանը կարող է առանց պատճառի նրանց ազատել աշխատանքից: «Բուհում ստալինյան ռեժիմ է», ասաց ՀՊՃՀ դասախոս, տեխնիկական գիտությունների դոկտոր, պրոֆեսոր Էդուարդ Մանուկյանըՙ հավելելով, որ վերջին 2 տարվա ընթացքում, ինչ Արա Ավետիսյանը ղեկավարում է բուհը, տարբեր հիմնավորումներով 150 հոգու ազատել է աշխատանքից: Աշխատանքից ազատման վերջին հրամանը ռեկտորը ստորագրել է օգոստոսի 29-ին եւ բուհի 34 դասախոսի ազատել աշխատանքից: Բացի դասախոսների կրճատումներիցՙ ռեկտորի հրամանով 25-30 տոկոսով կրճատվել է նաեւ աշխատավարձը: Դասախոսների խոսքովՙ իրենց համբերության բաժակը լցվել է, եւ հոկտեմբերի 4-ին ՀՊՃՀ-ի աշխատակազմը ստորագրահավաք է կազմակերպել ռեկտորի դեմՙ բողոքարկելով կրճատումները: Այս պահին ստորագրահավաքին միացել է 200 հոգի, սակայն, ըստ դասախոսների, ռեկտորի գործողություններին դեմ արտահայտվողների թիվը ավելի կշատանա:
«Պոլիտեխնիկի հաշվին մուտքերը մեծացել են, բայց դասախոսների աշխատավարձերը կրճատվում են: Մենք պահանջում ենք, որ դասախոսներին ցույց տան համալսարանի ռեալ մուտքերը, ֆինանսական կյանքն ավելի թափանցիկ դարձնեն», ասաց դասախոսըՙ հավելելով, որ աշխատավարձի կրճատման հետեւանքով դասախոսներից շատերը հեռանում են բուհից: Մինչդեռ համալսարանը պետության արդյունաբերության համար շատ կարեւոր նշանակություն ունի», ասաց Մանուկյանը:
Թեեւ ֆիզիկայի ամբիոնի դոցենտ Ազատ Միրզոյանի դասաժամերն ու ծանրաբեռնվածությունը չեն կրճատվել, սակայն աշխատավարձը 30000 դրամով կրճատվել է: Միրզոյանը հավաստիացնում է, որ նման վերաբերմունքի համալսարանում շատերն են արժանացել: «Աշխատում ենք նույն ծանրաբեռնվածությամբ, սակայն աշխատավարձը հաշվում են նոր սխեմայով, եւ կրճատվել է»:
Փաստաթուղթը, որ արդեն 200 հոգի ստորագրել են, դասախոսները կներկայացնեն նաեւ նախագահին եւ վարչապետին: Եթե աշխատավարձերը չբարձրացնեն, դասախոսները չեն բացառում դասադուլի եւ գործադուլի անցնելու տարբերակը: Նրանք հավաստիացնում են, որ մի քանի անգամ խնդրի վերաբերյալ զրուցել են ռեկտորի հետ: «Հիմա ամեն ինչ Արա Ավետիսյանի ձեռքում է, նա պետք է երկխոսության եզրեր գտնի դասախոսների հետ, այլապես «Պոլիտեխնիկը կփլուզվի»»:
