Տալլինում ընթացող ՖԻԴԵ-ի գլխավոր նստաշրջանում այդ կազմակերպության նախագահ Կիրսան Իլյումժինովը եւ աշխարհի 13-րդ չեմպիոն Գարի Կասպարովն իրենց թեկնածությունն են առաջադրել նախագահի պաշտոնում: ՖԻԴԵ-ի նոր նախագահի ընտրությունները տեղի կունենան 2014-ի օգոստոսին նորվեգական Տրոմսյո քաղաքում կայանալիք շախմատի համաշխարհային օլիմպիադայի ժամանակ:
Կիրսան Իլյումժինովի կարծիքով ՖԻԴԵ-ի նախագահի պաշտոնում Կասպարովի ընտրվելու դեպքում աշխարհի նախկին չեմպիոնը շախմատի միջազգային ֆեդերացիան կքաղաքականացնի եւ կօգտագործի անձնական նպատակներով. «Նա ժամանակին արդեն ստեղծել էր մի քանի կազմակերպություններ, սակայն դրանք կազմալուծվեցին, քանի որ ներգրավվել էին քաղաքականության մեջ: Նրան ամբիոն է հարկավոր, այլ ոչ թե համաշխարհային շախմատի զարգացում: Մեկ տարի անց ՖԻԴԵ-ի կոնգրեսում կպայքարեմ նախագահի պաշտոնի համար, որպեսզի թույլ չտամ միջազգային ֆեդերացիայի ներգրավումը քաղաքականության մեջ եւ շարունակեմ զարգացնել շախմատը ողջ աշխարհում»:
