ՀԱՅ ԽՈՑԱՍՈՒՍԵՐԱԿԻՐՆԵՐԸ ԶԲԱՂԵՑՐԻՆ ՈՂՋ ՊԱՏՎՈ ՊԱՏՎԱՆԴԱՆԸ
Երեւանում ավարտվեց սուսերամարտի միջազգային մրցաշարը, որը նվիրված էր մարզաձեւի միջազգային ֆեդերացիայի հիմնադրման 100-ամյակին: Բացի հայերից, մրցաշարին մասնակցեցին նաեւ Վրաստանի, Ռուսաստանի, Իրանի եւ Քուվեյթի պատանի սուսերամարտիկները:
Ճկասուսերակիրների պայքարում հաղթող ճանաչվեց քուվեյթցի Սաքի Ահմանը: 2-րդ տեղը գրավեց իրանցի Մոհսեն Համզեհեյը: Մրցանակային 3-րդ տեղերը զբաղեցրին հայաստանցի Մայքլ Հովհաննիսյանն ու վրացի Նիկոլոզ Վերխիաշվիլին:
Նույն մարզաձեւի աղջիկների մրցաշարում ուժեղագույնը վրացի Մարիամ Վախիշվիլին էր: Նրա հայրենակցուհի Լիկա Ջիջեիշվիլին գրավեց 2-րդ տեղը, իսկ բրոնզե մեդալների արժանացան Արփինե Աթոյանն ու Աննա Մելիան:
Տղաների խոցասուսեր մրցաձեւում տոն տվեցին հայ սուսերամարտիկներըՙ զբաղեցնելով պատվո ողջ պատվանդանը: Հաղթող ճանաչվեց Մայքլ Հովհաննիսյանը, 2-րդ տեղը զբաղեցրեց Մանվել Հովհաննիսյանը, իսկ 3-րդ մրցանակակիրներ դարձան Ավետիս Ծերունյանն ու Էդուարդ Հովիկյանը:
Աղջիկների մրցավեճում էլ Հայաստանը ներկայացնող Էմմա Պողոսովան հաղթեց իր մրցակցուհիներին եւ արժանացավ ոսկե մեդալի: 2-րդ տեղը գրավեց ռուսաստանցի Մարիա Զապատիվաննայան, 3-րդ տեղը զբաղեցրին վրացի Քրիստինե Միկաձեն եւ ռուսաստանցի Մարիա Արիստովան:
