Թուրքիան սկսել է պարիսպ կառուցել Սիրիայի սահմանի այն հատվածներում, որոնցով անօրինական անցումներ առավել հաճախ են պատահում: Տեղական իշխանություններին վկայակոչելովՙ այդ մասին հաղորդում է Ռոյթեր գործակալությունը:
Շինարարությունը սկսվել է Նուսայբին քաղաքի շրջակայքում, սիրիական Կամիշլի քաղաքից ոչ հեռու, որտեղ ապրում են շատ քրդեր եւ հաճախ տեղի են ունենում քաղաքացիական պատերազմի մասնակից տարբեր ուժերի բախումներ: Թուրքական իշխանությունների տվյալներով, սահմանն անցնելը անչափ հեշտ է հենց այդ մասում:
Պարսպի բարձրությունը երկու մետր է, իսկ վերեւում փշալար է ամրացվում, գրում է Hurriyet Daily News-ը: Թե որքան է լինելու տվյալ հատվածի երկարությունը, առայժմ չի հաղորդվում:
Ավելի վաղ Անկարան որոշել էր պարիսպ կառուցել սահմանի մեկ ուրիշ հատվածումՙ Հաթայի նահանգում: Այստեղ պարսպի երկարությունը կկազմի 2,5 կիլոմետր: Թուրք-սիրիական սահմանի ընդհանուր երկարությունը 800 կիլոմետրից ավելի է:
Սահմանամերձ շրջաններում իրադրությունը լարված է 2011-ից Սիրիայում ծավալված քաղաքացիական պատերազմի պատճառով: Հակամարտության գոտուց Թուրքիա են անցել մոտ 500 հազար փախստականներ: Նրանց հետ սահմանը հաճախ անօրինական կերպով հատում են սիրիացի ապստամբներն ու գրոհայինները, ինչպես նաեւ մաքսանենգները: Ավելին, Սիրիայում մարտեր են մղվում երբեմն Թուրքիայի սահմանի անմիջական մոտակայքում: Անկարայում կարծում են, որ այդ ամենը լուրջ սպառնալիք է ստեղծում երկրի անվտանգության համար:
