Ֆրանսիայի հայկական կազմակերպություններից մեկըՙ «Ֆրանսահայոց առաջընթացի շարժումը», մեր թերթի խմբագրությանը հասցեագրած նամակով դիմել է ՀՀ ԱԺ-ում «Ժառանգություն» խմբակցության պատգամավոր Զարուհի Փոստանջյանին: Շարժման անունից Ներսես Դուրման-Արաբյանը մասնավորապես գրում է. «Թեեւ սփյուռքը իրավունք չունի խառնվելու Հայաստանի ներքին գործերին, սակայն մենք չենք կարող լուռ մնալ որոշ իրադարձությունների առնչությամբ»:
Ապա նամակագիրը նշում է, որ Ստրասբուրգում հոկտեմբերի 2-ին կայացած ԵԽԽՎ նիստում ՀՀ նախագահ Սերժ Սարգսյանը ներկայացրեց Հայաստանի իրադրությունը, նաեւ անդրադարձավ Թուրքիայի եւ Ադրբեջանի հետ Հայաստանի հարաբերություններին: «Հստակ շարադրանքը եւ դիվանագիտական խոսքի որակը գրավեցին Եվրոպայի խորհրդի անդամ պետությունների տարբեր ներկայացուցիչների ուշադրությունը, եւ ելույթն արժանացավ ծափահարությունների», արձանագրում է նամակագիրը:
ՀՀ նախագահին դիմելովՙ ԵԽԽՎ-ում ՀՀ պատվիրակության անդամ, «Ժառանգության» ներկայացուցիչ Զարուհի Փոստանջյանն ասաց, թե Սերժ Սարգսյանը նախագահ է վերընտրվել ընտրակեղծիքներով, եւ որ Եվրոպայի խաղատներից մեկում տանուլ է տվել 70 մլն եվրո: Ի պատասխանՙ Սերժ Սարգսյանը ափսոսանք է հայտնել, որ «Ժառանգության» թեկնածու Րաֆֆի Հովհաննիսյանը ընտրությունների ժամանակ անհրաժեշտ հատկանիշները չի դրսեւորել նախագահ ընտրվելու համար: Նախագահն ասաց, որ ինքը երբեք չի մտել եվրոպական որեւէ խաղատուն, եւ եթե 70 միլիոն ունենար, մի մասը Փոստանջյանին կտար:
Փոստանջյանի պահվածքի կապակցությամբ Ներսես Դուրման-Արաբյանը գրում է. «Հայաստանում կամ սփյուռքում ոչ մի հայ չի կարող հանդուրժել անպատասխանատու անձանց նմանօրինակ խոսքերը, որոնք նսեմացնում են հայ ազգի արժանապատվությունը: ՀՀ վերջին նախագահական ընտրություններում պարտված իր տիրոջըՙ Րաֆֆի Հովհաննիսյանին ծառայելովՙ Զարուհի Փոստանջյանը ոչ մի առիթ բաց չի թողնում նախագահ Սարգսյանի իմիջին վնասելու համար: Մեծարգո տիկին Զարուհի Փոստանջյանը խրվել է ստի մութի մեջ եւ կարող է առանց ափսոսանքի այնտեղ խեղդվել: Սակայն նա չի կարող արատավորել կամ ծանակել հայկական ինքնությունը, հանուն որի սփյուռքահայությունն այնքան զոհողություն է արել, որպեսզի այն պատվով ներկայացնի միջազգային ատյաններում»:
