Բաքվի պաշտոնական քարոզչամեքենան որոշակիորեն իջեցրել է նշաձողը. վերջին «անկախ սոցիոլոգիական հարցումների արդյունքներով» Իլհամ Ալիեւի օգտին պատրաստ է քվեարկելու ընտրողների ոչ թե 89, ինչպես ավելի վաղ էր «կանխատեսվել», այլ` 81 տոկոսը: ADAM կենտրոնի հարցմամբ, մինչդեռ, ընդդիմությունը «կստանա ձայների 44, իշխանությունը` շուրջ 38 տոկոսը»:
Ամենայն հավանականությամբՙ Իլհամ Ալիեւի նախընտրական գործերն այնքան էլ հաջող չեն: Հակառակ դեպքում Ադրբեջանի ԱԳՆ-ն շատ արտառոց տեղեկատվություն չէր տարածի, որ «Սաուդյան Արաբիայի իշխանությունների հետ բանակցություններ են տարվում, որպեսզի Մեքքա ուխտագնացության մեկնած` Ադրբեջանի քաղաքացիների ընտրական իրավունքները չխախտվեն»:
Ըստ պաշտոնական վիճակագրության, քվեարկության օրը` հոկտեմբերի 9-ին, Սաուդյան Արաբիայում «կգտնվի Ադրբեջանի 4000 քաղաքացի», եւ իշխանությունները փորձում են ամեն ինչ անել, որ նրանք մասնակցեն նախագահի ընտրությանը: Ընդ որում, առայժմ հայտնի չէ, թե ինչպե՞ս է կազմակերպվելու քվեարկությունը: Ադրբեջանի ԱԳՆ մամլո խոսնակն այդ առթիվ երեկ պարզաբանել է, որ «Սաուդյան Արաբիայի օրենսդրությամբ Մեքքայում արգելված է քաղաքական բնույթի որեւէ միջոցառում»:
Նշանակում էՙ ադրբեջանցի ուխտագնացները Մեքքայում չեն կարող «կատարել իրենց քաղաքացիական պարտքը»: Մնում է ենթադրել, որ «ընտրական տեղամաս» կբացվի կամ Սաուդյան Արաբիայում Ադրբեջանի դեսպանատանը, կամ հյուրանոցներում: Ըստ Ադրբեջանի ԱԳՆ մամլո խոսնակի, «Սաուդյան Արաբիայում Ադրբեջանի դեսպանատունը փորձում է համաձայնության գալ արաբական կողմի հետ»:
Ընտրողների 80 եւ ավելի տոկոս «ձայներն ստանալու վստահություն ունեցող» իշխանություններին ի՞նչն է ստիպել դիմել նման քայլի, խռովել ուխտագնացների հանգիստը, դիվանագիտական քաշքշուկի մեջ մտնել Սաուդյան Արաբիայի հետ: Մանավանդ որ այդ երկրի օրենքներով Մեքքան, որպես սրբավայր, քաղաքական գործընթացներից դուրս է:
Ենթադրելի է, որ Ադրբեջանում իշխող վարչախմբին հուզում է ոչ թե ընտրողների «իրավունքների խախտումը», այլ` 4000 քվեն: Կասկածից դուրս է, որ եթե դիվանագիտական խողովակներով հաջողվի Սաուդյան Արաբիայում «ընտրատեղամաս» բացել, ապա այդ երկրում Ադրբեջանի դեսպանատունն ամեն ինչ անելու է, որպեսզի ուխտագնացները «միաձայն քվեարկեն երկրի վրա Մուհամմեդ մարգարեի փոխանորդ» Իլհամ Ալիեւի օգտին:
Իսկ դա իր հերթին նշանակում է, որ Ադրբեջանի իշխանությունները վստահ չեն քվեարկության արդյունքներին: Որպես ապացույց կարելի է վկայակոչել եւս մի արտառոց երեւույթ: Երեկ ադրբեջանական մամուլը տարածել է Դաղստանի առաջնորդ Ռամազան Աբդուլաթիպովի կոչը, որտեղ ասված է. «Հարգելի դաղստանցի հայրենակիցներ` Ադրբեջանի քաղաքացիներ, Ադրբեջանի բոլոր քաղաքացիների համար կարեւոր քաղաքական իրադարձության նախօրեին ձեզ կոչ եմ անում ակտիվորեն մասնակցել ընտրություններին եւ աջակցել պետության գործող ղեկավար Իլհամ Ալիեւին` որպես Ադրբեջանի հետագա խաղաղ զարգացման, Ռուսաստանի հետ հետագա համագործակցության ամրապնդման երաշխավորի»:
Սա արդեն վկայում է, որ Իլհամ Ալիեւը որեւէ աջակցություն չունի Ադրբեջանի լեզգիաբնակ շրջաններում: Այլապես Աբդուլաթիպովի օգնությանը դիմելու հարկ չէր լինի: Ընդ որում, սա առաջին դեպքն է, երբ Դաղստանի ինքնավարության ղեկավարությունը միջամտում է Ադրբեջանի ներքաղաքական կյանքին: Դատելով նրանից, որ Դաղստանի առաջնորդն Իլհամ Ալիեւին համարել է Ադրբեջանի եւ Ռուսաստանի «հետագա համագործակցության ամրապնդման երաշխավոր», նրա կոչը համաձայնեցված է Պուտինի հետ եւ լիովին տեղավորվում է ռուս-ադրբեջանական վերջին բարձր մակարդակի հանդիպմանը ձեռք բերված ոչ հրապարակային համաձայնությունների շրջանակներում:
Այս կերպ ընդգծվում է նոր իրողություն` Ադրբեջանում էթնիկ փոքրամասնությունների քաղաքական կողմնորոշումը կարող է վճռորոշ դեր խաղալ իշխող վարչախմբի վերարտադրությունն ապահովելու գործում: Եվ այստեղ մեծ է Ռուսաստանի դերը: Ինչո՞վ է Պուտինին փոխհատուցելու Իլհամ Ալիեւը նման անթաքույց աջակցության դիմաց` այլ հարց է: Բայց հաստատ ինչ-որ բան էլ պիտի լեզգիների, ավարների համար անի: Չէ՞ որ «պարտքը գեղեցիկ է հատուցմամբ»:
