ԱՆԱՀԻՏ ԳՐԻԳՈՐՅԱՆ
Մեր թերթի նախկին աշխատակից, գեղագետ եւ մշակութային մեկնաբան Լեւոն Լաճիկյանը վերջին տարիներին գրքեր հրատարակելուց զատ ծավալել է նաեւ ցուցահանդեսային բուռն գործունեություն` իր գրաֆիկական աշխատանքները ներկայացնելով Հայաստանի տարբեր մարզերում, ինչպես նաեւ արտասահմանում:
Նյույորքյան վերջին ցուցահանդեսից կարճ ժամանակ անց նա իր աշխատանքները կրկին ցուցադրեց Երեւանում, այս անգամ` Բնության պետական թանգարանում, որի ճեմասրահը հաճելի ցուցադրավայր է դարձել շատուշատ նկարիչների համար: Լեւոն Լաճիկյանի նոր ցուցահանդեսը, որ յոթերորդն է նրա անհատականների շարքում, կրում է «Ժառանգություն առանց սահմանների» խորագիրը: Վերջինս լիովին պատշաճում է ցուցադրված գործերի բովանդակությանը: Դրանք ներկայացնում են քաղաքային գողտրիկ տեսարաններ Գյումրուց ու Վենետիկից, Գորիսից ու Փարիզից, Մեղրուց ու Լիոնից:
«Նման համադրությունը,- մեր զրույցում ասաց նկարիչը,- թույլ է տալիս ճիշտ գնահատել ու արժեւորել մեզ հասած հայկական ժառանգությունը, ճշգրտել դրա տեղը համաշխարհային մշակութային համապատկերում»:
Ինչպես ցուցահանդեսի բացման արարողության ժամանակ նշեց Հայաստանի նկարիչների միության փոխնախագահ, պրոֆ. Խաչատուր Ազիզյանը, մինչ իր ստեղծագործությունները մեզ ներկայացնելը Լեւոն Լաճիկյանն արդեն նկարիչ էր, արվեստի մարդ: «Լինելով Նկարիչների միության արվեստաբանական սեկցիայի անդամ,- շարունակեց բանախոսը,- Լեւոնը մեր աչքի առջեւ սահուն անցում կատարեց դեպի գրաֆիկայի աշխարհ` ներկայացնելով իր նուրբ գծանկարները: Նա արվեստագետ է բառիս լայն իմաստով, ով իր ունակությունները դրսեւորում է արվեստի տարբեր ոլորտներում»: Միաժամանակ ցուցադրված աշխատանքներից նա առանձնացրեց «Ծաղկյալ Արարատ» նկարաշարը, որտեղ առկա է ուշագրավ վերաբերմունք մեր սուրբ լեռան գեղանկարչական վերարտադրմանը:
Իրոք, Լեւոն Լաճիկյանի Արարատներն աչքի են ընկնում ոչ միայն ջրաներկի նուրբ կիրառմամբ, այլեւ հեղինակի հանդես բերած բոլորովին նոր մոտեցմամբ: Գտնելով, որ «Արարատ լեռն ինքն արդեն անշրջանակ նկար է», արվեստագետը փորձել է աստվածային այդ կատարյալ ստեղծագործությունը պատկերել ծաղիկների տարբեր տեսակների ոճավորմամբ` ստեղծելով իրականի եւ երեւակայականի գեղեցիկ հյուսվածք:
Ընդհանուր առմամբ, ցուցահանդեսին ներկայացված 22 գրաֆիկական աշխատանքներ դիտողի մոտ ակնածանք ու սեր են առաջացնում առ մեր շրջակա բնական աշխարհն ու մարդու ձեռակերտած «երկրորդ բնությունը»` ճարտարապետական միջավայրը:
«Ժառանգություն առանց սահմանների» ցուցահանդեսը գործելու է մինչեւ հոկտեմբերի 15-ը:
