Պարագլուխները հայեր են
ԱՄՆ-ում 55 անձանց մեղադրանք է ներկայացվել հարկային եւ բանկային խարդախությունների խոշոր համակարգի բացահայտումից հետո: Նրանք մեղադրվում են երկրի հարկային վարչությունից 7 մլն դոլար հափշտակելու եւ 2 հազար մարդու անձնական տվյալները գողանալու մեջ: Այդ մասին սեպտեմբերի 30-ին հաղորդում է news.am կայքէջըՙ վկայակոչելով «Սան Դիեգո յունիոն թրիբյուն» թերթի հրապարակումը:
Համակարգին մասնակից են արտասահմանցի ուսանողներ: Որոշ մեղադրյալներ օգտագործել են գաղտնանուններ, կանխավճարային բջջային հեռախոսների եւ համակարգչային կեղծ հասցեներ: Բանկային աշխատողներից մեկը փողերի լվացման համար կեղծ հաշիվներ է բացել:
Ոստիկանությունը Սան Դիեգոյում, Լոս Անջելեսում, Լաս Վեգասում եւ Մերիլենդի նահանգում ձերբակալել է 22 կասկածյալների: 33 կասկածյալներ ազատության մեջ են, ոմանք հեռացել են երկրից:
Հանցախմբի պարագլուխները ՀՀ քաղաքացիներ կամ ամերիկահայեր են: Շատերը ԱՄՆ-ում եղել են ուսանողական, աշխատանքային կամ զբոսաշրջային այցագրերով:
Սան Դիեգոյում ԱՄՆ-ի հարկային վարչության ղեկավարի օգնական Էնթոնի Օռլանդոն ասում է, որ բացահայտված համակարգը իր բարդությամբ եւ ընդգրկմամբ համապատասխանում է միջազգային չափանիշներին:
Մեղադրական եզրակացություններից մեկում մեղադրանք է ներկայացվել 29 անձանց, սակայն դաշնային դատախազությունը հանցախմբի ղեկավարներ է համարում Արթուր Գրիգորյանին, Էռնեստ Սոլոյանին եւ Հովհաննես Հարությունյանին: Մեղադրյալներից շատերը Ղազախստանից են, Թուրքմենստանից, Ռուսաստանից:
Կալանավորված են Գլենդեյլի 21-ամյա բնակչուհի Իվոն Միխայլեսկուն, 30-ամյա Էռնեստ Սոլոյանը, 32-ամյա Արթուր Գրիգորյանը, 34-ամյա Աշոտ Մնացականյանը, հաղորդում է «Գլենդեյլ նյուզ-պրեսը»: Բըրբենքի 32-ամյա բնակիչ Արա Ադամյանը եւ 25-ամյա Վարդգես Վարդանյանը կալանավորված են բանկային խարդախությանը մասնակցելու մեղադրանքով:
Ի դեպ, news.am-ի հրապարակումը թարգմանաբար հայտնվել է նաեւ ադրբեջանական day.az ռուսալեզու կայքէջում:
