«Փոթորկի պահին չի կարելի նավը լքել»
Սիրիայի նախագահ Բաշար Ասադը իտալական RaiNews24 հեռուստաալիքին տված հարցազրույցում հայտարարել է, որ ինքը պատրաստ է ենթարկվել քիմիական բոլոր զինանոցների ոչնչացմանը վերաբերող ՄԱԿ-ի ԱԽ-ի բանաձեւին: Հարցազրույցը զետեղված է հեռուստաալիքի կայքէջում:
«Մենք քիմիական զենքի ձեռքբերումն ու օգտագործումն արգելող միջազգային համաձայնագրին միացանք նախքան ԱԽ-ում բանաձեւի ընդունումը», ընդգծել է Ասադը: Նա Սիրիայի առաջնահերթ խնդիրներն է համարում անհրաժեշտ տվյալների տրամադրումը եւ քիմիական զենքի ոչնչացման արարողակարգի դյուրացումը: Սակայն, նախագահի խոսքերով, քիմիական զենքի որոշ պահեստների դժվար է հասնել «ահաբեկիչների ներկայության պայմաններում»: Բացի դրանից, անհասկանալի է, թե կոնկրետ ինչ ձեւով պետք է ազատվել այդ զինանոցներից:
Ասադը նաեւ հայտարարել է, որ պատրաստ է թողնել իր պաշտոնը, եթե այդպես որոշի Սիրիայի ժողովուրդը, սակայնՙ 2014 թ. ընտրություններից ոչ շուտ: Նախագահի խոսքերով, «փոթորկի պահին չի կարելի նավը լքել. հարկավոր է այն հասցնել նավահանգիստ»:
ՄԱԿ-ի ԱԽ-ի բոլոր 15 մասնակիցները հիշյալ բանաձեւը ընդունեցին սեպտեմբերի 28-ին: Փաստաթղթում նախատեսվում է Սիրիայի իշխանությունների դեմ կոշտ միջոցներ ձեռնարկել, եթե նրանք չկատարեն առաջ քաշված պայմանները: Բանաձեւը սակայն, ռուսական կողմի պահանջով չի նախատեսում օտարերկրյա ռազմական միջամտություն: Վերջինիս համար հարկ կլինի ընդունել ՄԱԿ-ի ԱԽ-ի առանձին բանաձեւ:
Փաստաթուղթը նաեւ Ասադի կառավարությանը եւ ապստամբներին կոչ է անում սկսել հաշտության բանակցություններ: ՄԱԿ-ի գլխավոր քարտուղար Բան Կի Մունի խոսքերովՙ ԱԽ-ի բանաձեւի ընդունումը «երկարատեւ սպասումից հետո Սիրիայի վերաբերյալ ստացված առաջին հուսադրող լուրն է»:
ՄԱԿ-ի ԱԽ-ի մշտական անդամներից Ռուսաստանն ու Չինաստանը օրինական են համարում Ասադի կառավարությունը, ուստի պահանջում են հակամարտության դիվանագիտական լուծում: Բանաձեւի ընդունումից առաջ ԱՄՆ-ը, Մեծ Բրիտանիան եւ Ֆրանսիան ձգտում էին Ասադի պաշտոնաթողությանը հասնելու նպատակով փաստաթղթում կետ մտցնել ռազմական միջամտության վերաբերյալ, սակայն Մոսկվայի եւ Պեկինի կոշտ դիրքորոշումը խոչընդոտեց դրան:
