Վերջին 2-3 տարիներին Ռուսաստանի Դաշնությունում բնակված եւ Հայաստան վերադարձած կենսաթոշակառու, Արմավիր քաղաքի Սայաթ-Նովա փողոցի 23 շենքի բնակարան 3-ի բնակիչ Թելման Արիստակեսյանը չի կարողանում ստանալ 2010-ի ամբողջ տարվա իր կենսաթոշակը: Այդ մասին նա հայտնել է մեր թերթի խմբագրությանն ուղարկած նամակում:
Թելման Արիստակեսյանը նշում է, որ 2010-ից ապրել է Ռուսաստանի Դաշնությունումՙ իր տղայի տանը, հիվանդության պատճառով ավելի վաղ վերադառնալու հնարավորություն չի ունեցել, բուժվել է այնտեղ, ապա եւ ստացել ՌԴ քաղաքացիություն: Արմավիր է վերադարձել 2013-ին, դիմել է տեղի սոցիալական ապահովության բաժին, որտեղի աշխատակցուհին իրեն տեղակացրել է, որ 420 հազար դրամ ունի ստանալու: Սակայն նա նշել է, որ տվյալ` մարտ ամսին այդ գումարը չի կարող ստանալ, քանի որ ցուցակներն արդեն ուղարկվել են եւ խորհուրդ է տվել գալ հաջորդ ամսին: Թոշակառուն այդպես էլ վարվել է, բայց նրան թոշակը չեն տրամադրել ոչ ապրիլ, ոչ մայիս, ոչ էլ մյուս ամիսներին:
Դիմելով թերթի խմբագրությանըՙ Թելման Արիստակեսյանը հայտնում է, որ դիմել է աշխատանքի եւ սոցիալական հարցերի նախարարություն, բայց այնտեղ նրան չեն լսել եւ ներս չեն թողել, ուստի հարկադրված խնդրում է թերթի աջակցությունը այս հարցում:
Ներկայացնելով թոշակառուի նամակի բովանդակությունը, աշխատանքի եւ սոցիալական հարցերի նախարարության ուշադրությունն ենք հրավիրում եւ հույս հայտնում, որ նախարարությունը հնարավորինս արագ եւ օրենքի ընձեռած հնարավորությունների սահմաններում կկարգավորի այս հարցը:
