«Թուրան» գործակալության վստահելի աղբյուրները հայտնում են, որ Ադրբեջանի նախագահի աշխատակազմի ղեկավարի տեղակալ Նովրուզ Մամեդովը կարճատեւ այց է կատարել Վաշինգտոն»: Իլհամ Ալիեւի աշխատակազմում այդ տեղեկատվությունը հաստատել են երեկ, բայց հրաժարվել են մեկաբանություններից: Մամեդովի վաշինգտոնյան ուղեւորության նպատակի եւ հանդիպումների մասին պաշտոնապես ոչինչ չի ասել նաեւ ամերիկյան կողմը:
Այդուհանդերձ, «Թուրանը», վերստին հղում անելով միայն իր աղբյուրներին, հայտնել է, որ Իլհամ Ալիեւի աշխատակազմի ղեկավարի տեղակալը Վաշինգտոնում հանդիպել է ԱՄՆ պետքարտուղարի տեղակալ Բիլ Բերնսի հետ: Բանակցությունների որեւէ մանրամասնություն հայտնի չէ: Այս կապակցությամբ սեփական վարկածն է առաջադրել virtualaz.org-ը, որի պատկերմամբ` «Իլհամ Ալիեւը շտապ Վաշինգտոն է գործուղել իր էմիսարին»:
Ընդսմին, լրատվամիջոցը երկու երկրների հարաբերությունների ներկա փուլը գնահատել է «բավական լարված»: Պատճառն այն է, որ սեպտեմբերի առաջին տասնօրյակում ադրբեջանական կողմը երկու անգամ շատ գռեհիկ վերաբերմունք է ցուցաբերել պաշտոնական Վաշինգտոնի հանդեպ:
Նախ, Բաքվում փաստացի հրաժարվել են ընդունել ԱՄՆ պետքարտուղարի տեղակալի օգնական Թոմաս Մելիայի գլխավորած պատվիրակությանը, որը մտադիր էր ուսումնասիրել Ադրբեջանում նախագահական ընտրությունների հետ կապված իրավիճակը: Ադրբեջանի ԱԳՆ-ն ամերիկյան կողմին «խնդրել է այցը հետաձգել` մինչեւ կավարտվեն նախագահական ընտրությունները»: Նման «խնդրանքը» ոչ այլ ինչ է, քան ԱՄՆ պետքարտուղարության առջեւ Իլհամ Ալիեւի նախընտրական «խոհանոցի դռները փակելու» որոշում:
Գրեթե միաժամանակ Նախիջեւանի ինքնավարության ղեկավարությունը հրաժարվել է հանդիպել Բաքվում Միացյալ Նահանգների դեսպանի տեղակալին` պատճառաբանելով, թե «չափազանց զբաղված են»: Իր հանդեպ նման անհարգալի վերաբերմունքը Վաշինգտոնը հազիվ թե կարող էր չնկատելու տալ, առավել եւս` ներել: Ուստի մեծ է հավանականությունը, որ Նովրուզ Մամեդովը ոչ թե Վաշինգտոն է գործուղվել, այլ ԱՄՆ կառավարությունը պաշտոնական Բաքվի «երկար ականջները ձգելու» նպատակով բացատրություններ է պահանջել, եւ Իլհամ Ալիեւն ստիպված է եղել «զոհաբերել» աշխատակազմի ղեկավարի տեղակալին :
Հակառակ դեպքում նախընտրական քարոզարշավի «տրամաբանությամբ» Ադրբեջանում իշխող վարչախումբը ջանք չէր խնայի` Մամեդովի վաշինգտոնյան ուղեւորությունը ներկայացնելու որպես «ԱՄՆ կառավարության կողմից Իլհամ Ալիեւին լիակատար աջակցության եւս մի դրսեւորում»:
Չի բացառված նաեւ, որ Նովրուզ Մամեդովը Վաշինգտոնում ստիպված է եղել բացատրություններ տալ Ադրբեջանի արտաքին քաղաքական ուղեգծում Պուտինի այցից հետո նկատվող «տեղատվության» շուրջը: Ամերիկյան կողմի համար, ամենայն հավանականությամբ, առնվազն պիտի «անհասկանալի» լինի Սիրիայի եւ Իրանի հարցում պաշտոնական Բաքվի դիրքորոշման կտրուկ փոփոխությունը:
Վերջին մի քանի տարիներին Ադրբեջանը բազմիցս հավաստիացրել է, որ «տարածաշրջանային անվտանգության հարցերում ԱՄՆ-ի դաշնակիցն է», սակայն գործնականում Իլհամ Ալիեւը խնդիր ունի լուծելու երրորդ ժամկետով «վերընտրության» հարցը եւ հանուն այդ նպատակի զգալի զիջումներ է արել Ռուսաստանի եւ Իրանի հետ հարաբերություններում:
Ավելի վաղ մենք ենթադրել էինք, որ Իլհամ Ալիեւի համար «պարտամուրհակներ մարելու» ժամանակը կգա նախագահական «ընտրություններից» հետո: Ինչպես կարելի է ենթադրել, Վաշինգտոնում մտադիր չեն այդքան երկար սպասել եւ արդեն իսկ «հաշիվ են պահանջում»: Ադրբեջանում իշխող վարչախումբը հայտնվել է, մեղմ ասած, անհարմար կացության մեջ: Թերեւս այդ պատճառով է, որ Նովրուզ Մամեդովը «շփոթել է» Բաքվի ճանապարհը. երեկ նա Վաշինգտոնից ուղեւորվել է Անկարա` ամենայն հավանականությամբ հայցելու Թուրքիայի միջնորդությունը` Վաշինգտոնի հետ «ծագած տարաձայնությունները հարթելու» հարցում:
